IPL 2023 : मुंबई इंडियन्सविरुद्धच्या सामन्याला आंद्रे रसेल मुकणार?
मुंबई : रविवारी होणार्‍या (IPL 2023) मुंबईविरुद्धच्या सामन्यात केकेआरचा दमदार खेळाडू आंद्रे रसेलचे खेळणे नक्की नसल्याचे बोलले जात आहे. हैदराबादविरुद्धच्या सामन्यात गोलंदाजीदरम्यान आंद्रे रसेलच्या पायात काही समस्या निर्माण झाली होती, त्यानंतर त्याला मैदानाबाहेर पाठवण्यात आले होते. केकेआरचा स्टार खेळाडू रसेल आयपीएलच्या गेल्या काही हंगामापासून फिटनेसच्या समस्येशी झुंजत आहे. त्यामुळे त्याला गोलंदाजीतही अडचणी येत आहेत.
हैदराबादविरुद्धच्या सामन्यात रसेलने केवळ दोनच षटके टाकली, तेव्हा त्याच्या पायात दुखू लागल्याने त्याने मैदान सोडले. आयपीएल 2023 च्या हंगामात केकेआरसाठी रसेलने तीन सामन्यांमध्ये गोलंदाजी केली नाही; पण केकेआरचा कर्णधार नितीश राणाने त्याला हैदराबाद विरुद्ध गोलंदाजीसाठी बोलावले. या अष्टपैलू खेळाडूने पहिल्याच षटकांत दोन विकेटस् घेतल्या. (IPL 2023)
रसेलला आयपीएलमध्ये मोठे फटके मारण्यासाठी ओळखले जाते. त्याने अनेक प्रसंगी आपल्या शानदार फलंदाजीने कोलकात्यासाठी सामने जिंकले आहेत. आंद्रे रसेल फलंदाजीत काही मोठी कामगिरी करू शकला नसला तरी गोलंदाजीत त्याने आपली दमदार कामगिरी दाखवून दिली; पण त्यानंतर त्याला पायाच्या दुखापतीमुळे सामना सुरू असतानाच संघाबाहेर जावे लागले. याचा फटका आता केकेआरला बसणार का, हे पुढच्या सामन्यात कळणार आहे.
