मुंबई : विवाहितांच्या कौटुंबिक छळांमध्ये दिवसेंदिवस वाढ
मुंबई; पुढारी वृत्तसेवा : देशाची आर्थिक राजधानी असलेल्या मायानगरी मुंबईमध्ये कौटुंबिक छळाला कंटाळून यावर्षी 14 विवाहितांनी मृत्यूस कवटाळले आहे. तर, सहा जणींना आपला प्राण गमवावा लागला असल्याचे धक्कादायक वास्तव मुंबई पोलिसांकडे दाखल झालेल्या गुन्ह्यांच्या आकडेवारीतून समोर आले आहे. मुंबईमध्ये गेल्या 7 महिन्यात हुंड्यासाठी शारीरिक आणि मानसिक छळाचे तब्बल 526 गुन्हे दाखल झाले आहेत.
गेल्या वर्षीच्या पहिल्या 7 महिन्यात हा आकडा अवघा 397 होता. यावरुनच मुंबईत विवाहितांचा कौटुंबिक छळ दिवसेंदिवस वाढत असल्याचे पुन्हा एकदा स्पष्ट झाले आहे. हुंड्यासाठी होणार्‍या या छळाला कंटाळून यावर्षी 14 विवाहितांनी आत्महत्येचे टोकाचे पाऊल
उचलत मृत्यूस कवटाळले. सहा जणींना आपला प्राण गमवावा लागला आहे. तर, अन्य कारणांनी कौटुंबिक छळ केल्याचे 20 गुन्हेसूद्धा पोलिसांकडे दाखल झाले आहेत. धक्कादायक बाब म्हणजे, हुंड्यासाठी छळाच्या दाखल झालेल्या 526 गुन्ह्यांपैकी अवघ्या 192 गुन्ह्यांची उकल पोलीस करु शकले आहेत. त्यामुळे विवाहीत महिलांच्या सुरक्षेचा प्रश्न पून्हा एकदा उपस्थित करण्यात येत आहे.
मुंबईतील उच्चभ्रु वस्तीपासून ते झोपडपट्टीमध्ये वास्तव्यास असलेल्या बहुतांश विवाहित महिलांचा हा केवळ पैशांसाठी छळ केला जातो. दिसायला चांगली नाही किंवा लग्नात मानपान दिले नाही. तसेच माहेराहून पैसे घेऊन ये अशा विविध कारणांसाठी विवाहितांना शारीरिक आणि मानसिक त्रास देऊन त्यांचा छळ केला जातो. यातील अनेक महिला हा त्रास निमूटपणे सहन करत असल्याचेही दिसून येते.
गुन्ह्याचा प्रकार 2022 (31 जुलै.) 2021 (31 जुलै.)
हुंड्यासाठी शारीरीक आणि मानसिक छळ 526 397
हुंड्यासाठी छळाला कंटाळून आत्महत्या 14 08
हुंड्यासाठी छळाला कंटाळून मृत्यू 06 07
अन्य कारणांनी शारीरीक आणि मानसिक छळ 20 32
अन्य कारणांनी हत्या 11 13
अन्य कारणांनी आत्महत्या 09 19