नाशिक : पेट्रोलपंपांवर ठणठणाट, इंधनासाठी वणवण

नाशिक (सटाणा) : पुढारी वृत्तसेवा
सटाणा शहर परिसरात पेट्रोल-डिझेलचा ठणठणाट असून, वैतागलेल्या वाहनधारकांकडून याप्रश्नी तत्काळ तोडगा काढण्याची आग्रही मागणी होत आहे.

• ‘अहमदनगरचे नाव अहिल्यानगर करा’, गोपीचंद पडळकरांचं मुख्यमंत्र्यांना पत्र

शहरासह परिसरातील पेट्रोलपंपांवर सद्यस्थितीत पेट्रोल व डिझेलचा ठणठणाट दिसत असून, बुधवारी (दि. 1) या परिस्थितीचा आढावा घेतला असता मालेगाव रोडवरील सर्व पेट्रोलपंपाचे गेट बंद दिसून आले. साहजिकच यामुळे वाहनधारक वैतागले असून, या कृत्रिम टंचाईविषयी रोष निर्माण होत आहे. केंद्र सरकारने इंधनावरील अधिभार कमी केल्यानंतर पेट्रोल-डिझेलच्या किमती अचानक कमी झाल्या आणि त्यामुळे पेट्रोलपंपचालकांना आर्थिक नुकसान झाल्याचा गवगवा करीत, पेट्रोलपंपचालकांनी अप्रत्यक्षरीत्या अघोषित असहकार आंदोलन पुकारले आहे. पेट्रोलपंपचालकांकडून मागणीच्या तुलनेत मोजकेच पेट्रोल डिझेल खरेदी करून ते विक्री केली जात आहे. त्यामुळे पेट्रोल-डिझेल उपलब्ध होताच लांबच लांब रांगा लागतात, तर ते संपल्यानंतर मात्र एक – एक, दोन-दोन दिवस इंधनासाठी प्रतीक्षा करण्याची वेळ येत असल्याचे चित्र सद्यस्थितीत परिसरातील पेट्रोलपंपांवर दिसून येत आहे. यामुळे वाहनधारक कमालीचे वैतागले आहेत. सद्यस्थितीत लग्नाचा हंगाम सुरू असून, आपापल्या वाहनाने अपेक्षित लग्नस्थळ गाठण्यासाठी पेट्रोल-डिझेलशिवाय पर्याय नाही. परंतु, पेट्रोलपंपावर आल्यावर ते मिळत नसल्याचे पाहून संबंधितांचा कमालीचा हिरमोड होत आहे. प्रसंगी रांगा लावून ताटकळत बसावे लागते. दुसरीकडे मान्सूनपूर्व मशागतीच्या कामांनी वेग घेतला असताना डिझेलची गरज असून, ते मिळत नसल्याने शेतकरीवर्ग त्रस्त बनला आहे. पेट्रोलपंपचालक व कंपन्यांमधील सुंदोपसुंदी दूर करून तत्काळ तोडगा काढण्याची मागणी जोर धरू लागली आहे.

हेही वाचा:

• राज्यसभा निवडणूक : उपमुख्यमंत्री अजित पवार म्‍हणाले, “राष्ट्रवादीची मते…”
• Sologamy : तिचं ठरलंय….तीच वधू, तीच वर : गुजरातमधील २४ वर्षीय तरुणी करणार स्‍वत:शीच लग्‍न!
• Cryptocurrency markets : क्रिप्टोकरन्सी मार्केटमध्ये ब्लडबाथ! बिटकॉईनसह प्रमुख करन्सीत मोठी घसरण