नाशिक : बहुप्रतिक्षित नाशिक-पुणे रेल्वे: जिल्हा प्रशासनाकडून अधिग्रहण सुरू; पाच पट नुकसानभरपाई
नाशिक : पुढारी वृत्तसेवा
बहुप्रतिक्षित नाशिक-पुणे रेल्वेमार्गासाठी मंगळवारी (दि.31) सिन्नरमधील आणखी 4 गावांमधील जिरायतीचे दर जिल्हा प्रशासनाने निश्चित केले आहेत. त्यामध्ये वडगाव पिंगळा, चिंचोली, मुसळगाव व मोह या गावांचा समावेश आहे. चिंचोलीत हेक्टरी सर्वाधिक 1 कोटी 61 लाख 7 हजार 750 रुपये दर घोषित करण्यात आले. दरम्यान, दर घोषित केलेल्या गावांची संख्या आता 15 वर पोहोचली आहे.
देशातील पहिला सेमी हायस्पीड दुहेरी रेल्वेमार्ग पुणे-नाशिक दरम्यान उभारण्यात येत आहे. या प्रकल्पासाठी जिल्ह्यातील सिन्नर व नाशिक तालुक्यातील 22 गावांमधील 286 हेक्टर क्षेत्र थेट खरेदीद्वारे ताब्यात घेण्यात येत आहे. जिल्हा प्रशासनाकडून त्यासाठी गावनिहाय जिरायत, हंगामी बागायत व बारमाही बागायत अशा तीन प्रकारांत जमिनीचे प्राथमिक दर निश्चित करून त्यानुसार पाचपट नुकसानभरपाई दिली जात आहे. जिल्हा प्रशासनाकडून मंगळवारी (दि.31) सिन्नर तालुक्यातील चार गावांचे प्राथमिक दर निश्चित करून ते घोषित करण्यात आलेे. त्यामध्ये वडगाव पिंगळा येथे 71 लाख 64 हजार 650 रुपयांचा दर निश्चित करण्यात आला. चिंचोलीत 1 कोटी 61 लाख 7 हजार 750, मुसळगावला 83 लाख 31 हजार 250, तर मोहमध्ये 71 लाख 25 हजार 350 रुपयांचे दर घोषित करण्यात आले आहेत. याशिवाय शिवाजीनगर, चिंचोली, नांदूरशिंगोटे व मानोरी येथील हंगामी बागायत व बारमाही बागायतीचे दरदेखील प्रशासनाने जाहीर केले आहेत.
सहा महिन्यांची मुदत
जिल्हा प्रशासनाने आतापर्यंत सिन्नर तालुक्यातील अकरा गावांमधील दर निश्चित केले आहेत. त्यामध्ये मौजे बारागावपिंप्री, पाटपिंप्री, दातली, वडझिरे, देशवंडी, दोडी बु. व खुर्द, गोंदे, शिवाजीनगर, मानोरी व नांदूरशिंगोटे या गावांचा समावेश आहे. या निश्चित केलेल्या दरानुसार खासगी वाटाघाटीद्वारे थेट खरेदी करण्यासाठी महारेल व जमीनमालकांना पुढील 6 महिन्यांची मुदत देण्यात आली आहे. त्यानंतर सक्तीने भूसंपादन करण्यात येणार आहे. त्यामुळे भूधारकांनी मुदतीचा लाभ घ्यावा, असे आवाहन जिल्हाधिकारी गंगाथरन डी. यांनी केले आहे.
जिरायतीचे प्राथमिक दर (प्रतिहेक्टरी)
गाव प्राथमिक दर पाच पट दर
वडगाव पिंगळा 14,32,930 71,64,650
चिंचोली 33,21,550 1,61,07,750
मुसळगाव 16,66,250 83,31,250
मोह 14,25,070 71,25,350
जिल्हा समितीने निश्चित केलेले दर (प्रतिहेक्टरी)
गाव जिरायत हंगामी बागायत बागायत बारमाही
शिवाजीनगर 53,19,300 79,78,950/-
नांदूरशिंगोटे 72,32,800 1,08,49,200 1,44,65,600
चिंचोली 1,61,07,750 2,41,61,625 3,22,15,500
मानोरी 57,79,650 86,69,475/ 1,15,59,300