कोकण : पर्यटक निवासांचे ९० टक्के आरक्षण फुल्ल
रत्नागिरी ; पुढारी वृत्तसेवा : वर्षाअखेर कोकणातील निसर्गाच्या आणि सागरी किनार्‍यावर लाटांच्या गाजेच्या साक्षीने नववर्षाचा जल्‍लोष साजरा करण्यासाठी पर्यटकांनी कोकणाला पसंती दिली आहे. त्यामुळे दोन वर्षांनी पुन्हा एकदा कोकणातील पर्यटनस्थळे गर्दीने फुलणार आहेत. यंदाच्या हंगामात महाराष्ट्र पर्यटन विकास महामंडळाच्या (एमटीडीसी) पर्यटक निवासांना पर्यटकांनी प्राधान्य देताना डिसेंबरमध्ये पर्यटक निवासांचे 90 टक्के आरक्षण फुल्ल झाले असल्याचे एमटीडीसीच्या प्रादेशिक कार्यालयातर्फे सांगण्यात आले.
वातावरणातील गारवा आणि पर्यटकांची ओढ लक्षात घेऊन नववर्षानिमित्त एमटीडीसीतर्फे कोकणात अनुभवात्मक उपक्रम राबविण्यात येत आहेत. स्वच्छ आणि रमणीय समुद्रकिनारे, ऐतिहासिक गड-किल्ले, प्राचीन मंदिरे आणि संस्कृती, हिरवागार निसर्ग, आयुर्वेदिक आणि नैसर्गिक अप्रतिम खाद्य पदार्थांची मेजवानी देण्यासाठी महामंडळ सज्ज झाले आहे.
पर्यटनासाठी पूरक वातावरण पाहता पर्यटक कोकणातील निसर्गाकडे धाव घेत आहेत. त्यांच्या सोयीसाठी महामंडळाची सर्वच पर्यटक निवासे, रिसॉर्ट खुली असून पर्यटकांना उच्च दर्जाची सेवा आणि आरोग्यपूर्ण सुविधा देण्यासाठी तत्पर आहेत. या पर्यटन हंगामात योगा आणि वेलनेसची शिबिरे घेण्याचे प्रस्तावित असून स्थानिक सहली, ट्रेक, गडभ्रमंतीसारखे उपक्रम राबविण्यात येणार आहेत. विविध छंद, पारंपरिक खेळ इत्यादी बाबींना प्राधान्य देण्यात येणार आहे. यासाठी स्थानिक कलाकार, पर्यटन उद्योगाशी निगडित व्यावसायिकांना प्रोत्साहन देण्यात येत आहे.
पर्यटक निवासांमध्ये छोटेखानी मनोरंजनाचे आणि सांस्कृतिक कार्यक्रम पर्यटकांच्या सेवेत सादर करण्याचाही महामंडळाचे नियोजन आहे. कोरोनाचा प्रभाव कमी झाल्यानंतर महामंडळाने मोठ्या प्रमाणावर पर्यटकांसाठी सोयी-सुविधा उपलब्ध करुन दिल्या असून जवळपास दोन वर्षानंतर पर्यटकांना निखळ पर्यटनाचा, निसर्गाचा आणि अप्रतिम खाद्यपदार्थाचा आस्वाद घेण्याची संधी उपलब्ध करुन दिली आहे.
पर्यटनविषयक सुविधा, खाद्यपदार्थांची माहिती, आसपासच्या निसर्गाची माहिती, स्थानिक खेळ, परंपरा, सांस्कृतिक कार्यक्रम, वन्यजीव, वृक्षवल्ली तसेच महामंडळामार्फत पर्यटकांसाठी घेण्यात येणारी खबरदारी, सुरक्षिततेच्या उपाययोजना यांचीही माहिती वेबसाईट, फेसबूक आणि व्हॉट्सॅप ग्रुपच्या माध्यमातून देण्यात येत आहे. कोव्हीड संदर्भातील शासनाच्या मार्गदर्शक तत्त्वांचे पालन करून पर्यटकांच्या आरोग्याचीही खबरदारी घेण्यात येत असल्याने पर्यटकांनी महामंडळाच्या साथीने मावळत्या वर्षाला निरोप देण्याचा प्रसंग संस्मरणीय करावा, असे आवाहन एमटीडीसीने केले
आहे.
पर्यकांसाठी वैद्यकीय सुविधा
पर्यटक निवासांमध्ये निर्जंतुकीकरणाच्या उपाययोजना अव्याहतपणे सुरू असून निवास, उपाहारगृहे आणि अनुषंगिक बाबींची काटेकोरपणे स्वच्छता आणि निर्जंतुकीकरण करण्यात येत आहे. तसेच शरीराचे तापमान मोजणारी यंत्रणा, सॅनिटाईजिंग स्प्रे, ऑक्सिमीटर, मुखपट्टी, हातमोजे अशी व्यवस्थाही करण्यात आली आहे. तातडीच्या वैद्यकीय कारणांसाठी सुविधा उपलब्ध करून देण्यात येणार आहे.