खतांचा काळाबाजार रोखण्यासाठी 12 पथके; बोगस प्रकार करणार्‍यांचे धाबे दणाणले
सातारा; पुढारी वृत्तसेवा : खरीप हंगामातील विविध पिकांसाठी आवश्यक रासायनिक खते व बियाण्यांचा मुबलक साठा जिल्ह्यात उपलब्ध आहे. रासायनिक खतांची कृत्रिम टंचाई निर्माण करुन खतांचा काळाबाजार रोखण्यासाठी जिल्हयात 12 भरारी पथकांची स्थापना करण्यात आली आहे. त्यामुळे बोगस प्रकार करणार्‍यांचे धाबे दणाणले आहेत. दरम्यान, शेतकर्‍यांनी कृषि सेवा केंद्र चालकांकडून खरेदीची पक्की बिले घेण्याचे आवाहन करण्यात आले आहे.
जिल्ह्यात खरीप हंगामाचे सरासरी क्षेत्र 3 लाख 97 हजार 348 हेक्टर आहे. यासाठी 47 हजार 339 क्विंटल बियाणांची मागणी नोंदवण्यात आली आहे. त्यासाठी 1 लाख 36 हजार 500 मेट्रीक टन रासायनिक खतांची मागणी कृषि आयुक्तालयाकडे केली आहे. कृषी आयुक्तालयाकडून जिल्ह्याच्या खरीप हंगामासाठी 1 लाख 15 हजार 101 मेट्रिक टन रासायनिक खत व 54 हजार 770 नॅनो युरिया बॉटलचे आवंटन मंजूर झाले आहे. यामध्ये युरिया 42 हजार 521 मे. टन, डीएपी 12 हजार 131 मे.टन, एमओपी 6 हजार 761 मे.टन, सुपर फॉस्फेट 11 हजार 939 मे.टन तर इतर संयुक्त खते 39 हजार 19 मे.टन खतांचा समावेश आहे. याबाबतची माहिती जिल्हा अधीक्षक कृषी अधिकारी भाग्यश्री फरांदे व जिल्हा परिषदेचे कृषि विकास अधिकारी विजय माईनकर यांनी दिली.
सद्यस्थितीत जिल्ह्यात 63 हजार 561 मे.टन खत उपलब्ध आहे. यामध्ये मागील हंगामातील 55 हजार 862 मे.टन खत शिल्लक असून दि.1 एप्रिल पासून 7 हजार 699 मे.टन खत पुरवठा करण्यात आला आहे. त्यामुळे युरिया 18 हजार 943 मे.टन, डीएपी 9 हजार 119 मे.टन, एमओपी 834 मे.टन, सुपर फॉस्फेट 9 हजार 798 मे.टन, इतर संयुक्त खते 24 हजार 867 मे. टनचा उपलब्ध आहेत. रासायनिक खतांचा काळाबाजार रोखण्यासाठी जिल्ह्यात 12 भरारी पथके स्थापन करण्यात आली आहेत. प्रत्येक तालुका व जिल्हास्तरावर सनियंत्रण कक्षाची स्थापन केली आहे. कृषी सेवा केंद्र चालकांनी शेतकर्‍यांना खते बियाणे व कीटकनाशके खरेदीची पक्की बिले द्यावीत, अशा सूचना करण्यात आल्या आहेत.
खत उपलब्धता माहितीसाठी कृषिक अ‍ॅप
आपल्या जवळपासच्या कृषी सेवा केंद्रातील खत उपलब्धतेची माहिती पाहण्यासाठी कृषी विभागाने कृषिक अ‍ॅपच्या माध्यमातून सेवा उपलब्ध केलेली आहे. हे कृषिक अ‍ॅप गुगल प्ले स्टोअरवर उपलब्ध असून शेतकरी बांधवांनी हे अ‍ॅप डाऊनलोड करून खत उपलब्धतेच्या सेवेचा लाभ घ्यावा, असे अवाहन कृषी विकास अधिकारी विजय माईनकर यांनी केले आहे.