पुणे विभागात 32 तहसीलदारांच्या बदल्या
पुणे : पुढारी वृत्तसेवा : पुणे विभागातील 32 तहसीलदारांच्या बदल्या केल्या आहेत. त्यानुसार मुळशी तहसीलदारपदी रणजित भोसले, बारामतीच्या तहसीलदारपदी गणेश शिंदे, पिंपरी चिंचवडच्या तहसीलदारपदी अर्चना निकम यांची नियुक्ती शासनाने केली आहे. तर, पुणे विभागातील अनेक तहसीलदारांना विदर्भ आणि मराठवाड्याचा रस्ता दाखवला आहे. त्यामुळे अनेक तहसीलदारांचा हिरमोड झाल्याची चर्चा प्रशासनात होत आहे. मागील वर्षी मुख्यमंत्री यांनी बदल्यांना दिलेली स्थगिती आणि त्यानंतर राज्यात झालेले सत्तांतर, यामुळे महसूल विभागातील अधिकार्‍यांच्या बदल्या रखडल्या होत्या. आता मात्र पुढील वर्षी होणार्‍या लोकसभा व विधानसभा निवडणुकीच्या अनुषंगाने उपजिल्हाधिकारी व तहसीलदार यांच्या बदल्या करण्यात येत आहेत.
वेल्हा तहसीलदारपदी दिनेश पारगे, पुणे नागरी समूह तहसीलदारपदी सुनीता आसवले, विभागीय आयुक्त कार्यालय सर्वसाधारण शाखेच्या तहसीलदारपदी मनीषा कुलकर्णी, शेती महामंडळ येथे रूपाली रेडेकर, जिल्हा पुनर्वसन शाखेत तहसीलदारपदी
संजय पाटील यांची नियुक्ती शासनाने केली आहे.
मान्यवरांना थेट गडचिरोलीला पाठवले
शासनाने यंदा बदल्या करताना जिल्ह्यातील अनेक मातब्बर तहसीलदारांना थेट गडचिरोली, औरंगाबाद, चंद्रपूर, अमरावती या जिल्ह्यांत पाठविले आहे. मावळचे तहसीलदार मधुसुदन बर्गे यांची बदली धानोरा तहसीलदार (जि. गडचिरोली) येथे केली. मुळशीचे तहसीलदार अभय चव्हाण यांची तहसीलदार शिरूर कासार (जि.औरंगाबाद), वेल्हा तहसीलदार शिवाजी शिंदे यांची बदली चंद्रपूर जिल्ह्यात, बालाजी सोमवंशी यांची बदली नागपूर जिल्ह्यात, आंबेगावच्या तहसीलदार रमा जोशी यांची बदली अमरावती जिल्ह्यात, तर बारामतीचे तहसीलदार विजय पाटील यांची बदली चंद्रपूर जिल्ह्यात करण्यात आली आहे.
