कोल्हापूर : जीव धोक्यात घालून विज कर्मचारी ठरले महापुरातले देवदुत

By:Amruta Chougule Published on: July 28, 2021, 7:09 AM

कोल्हापूर : पुढारी वृत्तसेवा : कोल्हापूर जिल्ह्यात फ्री कॅचमेंट एरियात पडलेल्या तुफानी पावसाने सर्वच नद्यांना महापूर आला. त्यामुळे विद्युत यंत्रणा कोलमडली. अनेक उपकेंद्रे, रोहित्रे, विद्युत वाहिन्या, विद्युत खांब पाण्याखाली गेले. गावांगावातील पाणीपुरवठा योजनांचे पंपही पाण्यात अडकले. अनेक ठिकाणी विद्युत यंत्रणा बंद पडली. काही ठिकाणी सुरक्षिततेसाठी वीजपुरवठा बंद केला. दरम्यान आहोरात्र राबत विज कर्मचारी काम करत होते.

विज कर्मचारी आपल्या जिवाची पर्वा न करता विद्युत पुरवठा खंडीत होउ नये यासाठी प्रयत्नशिल होते.

भरपावसात आणि महापुराच्या पाण्यात थंडीने कुडकुडत असतानही या कर्मचार्‍यांनी ग्राहकांच्या घरात प्रकाश पडला पाहिजे या भावनेतून थंडी, वारा, पाऊस याचा विचार न करता सेवा बजावली.

नागाळा, गांधीनगर, थावडे, पाटपन्हाळा, आवाडे मळा, शिरवाड व शिरटी अशी 7 उपकेंद्रे बंद असल्याने 26 गावांत अंधाराचे साम—ाज्य निर्माण झाले.

31 गावांत काही प्रमाणात वीजपुरवठा खंडित झाला.

अद्याप 52 हजार 273 ग्राहकांचा वीजपुरवठा बंद आहे.

22 वीज वाहिन्या बंद, तर 864 वितरण रोहित्रे बंद आहेत. उच्चदाब वीज वाहिनीचे 112 व लघुदाब वाहिनीचे 192 खांब पडले आहेत.

फुलेवाडीच्या आरे कक्षातील जनमित्र संदीप पाटील, विकास वरुटे व युवराज निकम यांनी नदीपात्र क्रॉसिंगच्या फिडरवरील उच्चदाब वीज वाहिनीची दुरुस्ती पाण्यात जाऊन केली.