कर्जत : घुमरीत विजेचा लपंडाव थांबणार; उपकेंद्राचे आ. पवार यांच्या हस्ते भूमिपूजन

कर्जत/कोंभळी; पुढारी वृत्तसेवा : कर्जत-जामखेड मतदारसंघातील शेतकर्‍यांना भेडसावत असलेली विजेची अडचण सोडविण्यासाठी आमदार रोहित पवार यांनी महाविकास आघाडी सरकारच्या काळात नवीन वीज उपकेंद्र व लिंक लाईनाठी मंजुरी मिळविली होती. यातील घुमरी येथील 2 कोटी 2 लाख रुपये किमतीच्या 33/11 केव्ही नवीन वीज उपकेंद्राचे भूमिपूजन नुकतेच आमदार पवार यांच्या हस्ते झाले. पडले. या नवीन उपकेंद्रामुळे परिसरातील घुमरी, थेरगाव, निमगाव गांगर्डा, बेलगाव व नागमठाण या गावातील शेतकर्‍यांना फायदा होणार असून, सहा गावांवर पूर्वी येणारा ताण देखील पूर्णपणे कमी होणार आहे.

सध्याच्या 5 गावांत पूर्ण आणि उच्च दाबाने वीजपुरवठा होण्यासाठी मदत होणार आहे. वीजपुरवठा सुरळीत ठेवण्यासाठी आमदार पवार यांच्या प्रयत्नातून लिंक लाईन व उपकेंद्राचे काम सुरू करण्यात आले आहे. त्यांच्या माध्यमातून अनेक कामांना गती मिळाली आहे. त्याचबरोबर राशीनमध्ये असलेल्या उपकेंद्राची क्षमता वाढविण्यासही त्यांनी मंजुरी मिळविली आहे. त्यास कार्यारंभ आदेश देण्यात आले आहेत. त्यामुळे उपकेंद्रावरील ताण कमी होऊन अखंडित वीजपुरवठा होण्यास मदत होणार आहे.

कर्जत तालुक्यातील 33/11 पाटेवाडी उपकेंद्र येथे अतिभारामुळे आजूबाजूच्या परिसरातील वीजपुरवठ्यात मोठ्या प्रमाणात अडचणी येत होत्या. त्यामुळे आमदार निधीतून पाटेवाडी उपकेंद्र येथे 3 किलोमीटर लिंक लाईनचे कामही पूर्ण झाले आहे. नवीन उपकेंद्रामुळे सध्याच्या उपकेंद्रांवर आलेला ताण कमी होण्यास मदत होणार असून, त्यावर अवलंबून असणार्‍या गावांची विजेची अडचणही कायमची दूर होणार आहे.

नवीन वीज उपकेंद्र मंजूर
नायगाव, दिघोळ, चिलवडी व चौंडी येथे आमदार पवार यांच्या प्रयत्नातून नवीन वीज उपकेंद्र मंजूर आहेत. यातील नायगाव उपकेंद्राचे काम पूर्ण होऊन ते सुरू झाले आहे. इतर कामे निविदा स्तरावर आहेत. राशीन, मिरजगाव, कुळधरण, भांबोरा आणि खांडवी येथील उपकेंद्राची क्षमता वाढविण्यासही शासनाने मंजुरी दिली आहे. राशीनच्या कामाचे कार्यारंभ आदेश दिले आहेत.