उजनीत लहान मासेमारी जोरात ; जलसंपदा खात्याची बघ्याची भूमिका
पळसदेव : पुढारी वृत्तसेवा : उजनी जलाशयात (यशवंत सागर) बेकायदेशीरपणे लहान मासेमारी करणार्‍या मच्छिमारांवर तत्काळ कारवाई करण्याचे आदेश जिल्हाधिकारी डॉ. राजेंद्र देशमुख यांनी दिले होते. मात्र, जलसंपदा विभागाकडून त्यांच्या आदेशाला केराची टोपली दाखवल्याचे दिसून येते. यामुळे लहान मासेमारी मारणार्‍या परप्रांतीयांचा व्यवसाय जोरात सुरू आहे. स्थानिक मच्छिमारांकडून जलसंपदा विभागाच्या कामकाजावर तीव्र नाराजी व्यक्त करीत आंदोलन छेडण्याचा इशारा देण्यात आला आहे. गेली 28 वर्षांमध्ये उजनी जलाशयात मत्स्यबीज न सोडल्यामुळे व इतर गावरान मासळी मोठ्या प्रमाणात मारल्याने अनेक प्रकारची मासळी उजनी जलाशयातून हद्दपार झाली आहे. आणखी काही मासेही नामशेष होण्याच्या मार्गावर आहेत. उजनीमध्ये मासळी नसल्यामुळे 35 ते 40 हजार मच्छिमारांचे रोजगार बंद पडण्याच्या मार्गावर आहेत. अनेक व्यापारी, हॉटेल मालक, विक्रेते अशांच्या रोजगारावरही याचा परिणाम झाला आहे. स्थानिक व तालुक्यातील गावगुंडांकडून परप्रांतीय मच्छिमारांकडून उजनीत मासेमारी करून घेतली जाते. जादा मासेमारीसाठी परप्रांतीयांकडून जिलेटीनचा स्फोट करणे, किंवा केमिकल भातात मिक्स केलेले खाद्य रात्रीच्या वेळेत टाकले जात आहे. असे खाद्य खाऊन हजारो किलो मासळी मच्छरदानी वडाप जाळीच्या साहाय्याने पकडून विकली जाते.
जलसंपदा धाडस दाखवेना
उजनीतील प्रदूषण थांबवण्यासाठी तसेच रोजगार उपलब्ध करण्यासाठी जिल्हाधिकारी डॉ. राजेंद्र देशमुख यांनी नुकतीच बैठक बोलून बेकायदेशीर मासेमारीला आळा घालण्याचे आदेश दिले आहेत. उजनी धरण जलसंपदा खात्याकडे असल्यामुळे जलसंपदा खात्याने घेऊन रीतसर कारवाई करण्याची आवश्यकता होती. मात्र, जलसंपदा विभागाने करवाई करण्याचे धाडस दाखविलेले नाही.
लहान मासे मारू नयेत म्हणून परिपत्रक जारी केले आहे. परंतु, तरीही लहान वडाप जाळीच्या साहाय्याने मासळी मारणार्‍या मच्छिमारांवर पोलिसांची मदत घेऊन रीतसर तक्रार करून गुन्हे दाखल केले जातील.
-नितीन खाडे, उपविभागीय अभियंता, भीमा उपसा सिंचन, पळसदेव.
