लवंगी मिरची : वाकेन, पण मोडणार नाही..!
दसरा संपला की, मराठी माणसांना वेध लागतात ते दिवाळीचे! दिवाळी हा वर्षातील सर्वात मोठा आणि आनंदाचा असा सण आहे. देश-विदेशातील मराठी तरुण दिवाळीसाठी हमखास आपल्या गावी येत असतात. दिवाळीची तयारी म्हणून महिलावर्ग फराळाची तयारी करत असतो. आजच्या रेसिपीज केवळ भगिनीवर्गासाठी आहेत. दिवाळीत असे पदार्थ केले पाहिजेत की, पुन्हा म्हणून पुढील वर्षी कुणी घरी फराळ बनवा म्हणून विषयसुद्धा काढला नाही पाहिजे.
बोट लावले, तर भसकन फुटणारे लाडू, तर कुणीही बनविल; पण यादगार लाडू असे तयार करा… कर्तव्यकठोर लाडू : पाकाची चाचणी बिघडवून तयार करावयाचे हे लाडू आपल्या वैशिष्ट्यपूर्ण गुणधर्मांमुळे बहुविध उपयोगी असतात. पाषाणसद़ृश कठोरतेमुळे हे एका बसणीत कुणीही खाऊ शकत नाही. असे लाडू समोरच्या दातांनी टोकरूनच खावे लागतात. सबब असे लाडू महिनोंमहिने टिकतात. वेळ प्रसंग आल्यास आपल्या मुलांना क्रिकेट खेळताना त्यांचा चेंडू म्हणून उपयोग होऊ शकतो. ब्याट तुटेल; पण चेंडू म्हणजेच लाडू फुटणार नाही याची हमी असते. बाजारहाट शॉप्पिंग करायला जाताना किंवा एकंदरीतच घराबाहेर पडताना आजकाल महिलांची पर्स ओढून नेणे, गळ्यातील मंगळसूत्र किंवा चेन, सायकल आणि मोटारसायकलवरील चोराने ओढून नेणे अशा भुरट्या चोर्‍यांचे प्रमाण वाढलेले आहे.
मंगळसूत्र ओढणार्‍या चोराला पकडणे शक्य नसते. कारण, तो वेगाने सायकल किंवा बाईक दामटीत पळून जातो. कर्तव्यकठोर लाडू महिलांनी नेहमी पर्समध्ये सोबत बाळगावेत. अशाप्रसंगी उपयुक्त सिद्ध होतात. अशी वेळ आलीच, तर तत्काळ पर्समधील कर्तव्यकठोर लाडू काढून चोराच्या टाळक्याच्या दिशेने नेम धरून फेकल्यास चोराचा कपाळमोक्ष होऊन तो धारातीर्थी पडू शकतो. असे लाडू गृहिणींना स्वसंरक्षणार्थ शस्त्र म्हणूनसुद्धा वापरता येतात.
बेधडक चकल्या : चकल्या शक्यतो नव्हे, तर नेहमी विकतच आणाव्यात. क्वचित कधी नवरा आणि मुले चकल्या घरी करण्याचा आग्रह करतील, तर या चकल्या जरुर तयार कराव्यात. नवरा असा आग्रह नेहमीच करण्याची शक्यता असते. कारण, कधीकाळी म्हणजे बालपणी त्याच्या आईने त्याला खमंग चकल्या खाऊ घातलेल्या असतात आणि तो ती चव विसरायला तयार नसतो.
कृती : चकलीची भाजणी अशी करावी की, चकलीने ‘वाकेन, पण मोडणार नाही’ असा बाणा कायम ठेवला पाहिजे. गोल चकली पूर्ण उलगडून न तुटता अर्धा फुट लांबीची झाली पाहिजे. अशा चकल्या खाताना त्यात प्लास्टिक, रबर वगैरेंचा वापर केला आहे की काय, अशी शंका सर्वांना वाटली पाहिजे. तन्मयतेने चघळल्याशिवाय चकलीने आपला आकार बदलता कामा नये. अशा चकल्या संपल्याच नाहीत, तर रिकामपणाचा चाळा म्हणून चघळण्यासाठी कॉलनीमधील कुत्र्यांना वाटून टाकाव्यात. अनुभवी कुत्री अशा चकल्या दिसताच जीवाच्या आकांताने धूम ठोकतात.
उपपदार्थ : या चकल्या हमखास उरतातच. उरलेल्या चकल्या दोन-तीन दिवस पाण्यात भिजवून ठेवून त्याचा लगदा करावा. लगदा मिक्सरमधून काढून त्यात कांदे, पुदिना पाने, जिरे आणि किंचितसा हिंग टाकून त्याची भजी करावीत. अशा भज्यांना अनुभवी कुत्रीसुद्धा फसतात. दिवाळीचा आनंद द्विगुणित करण्यासाठी सर्वांनी एकमेकांशी विनयाने वागले पाहिजे. दिवाळी सणच असा ज्यामुळे आनंदाला भरते येते. सर्वत्र आनंदाचे वातावरण असते. त्यातही फराळ म्हणजे दिवाळीचा आनंद लुटण्याचा एक राजमार्गच आहे. त्यामुळे गृहिणींनी आपण तयार केलेले फराळ एकेमकांना वाटले, तर आनंदाला उधाण, हे नक्की!