SSC HSC Exam : महाराष्ट्र राज्य माध्यमिक व उच्च माध्यमिक परिक्षेच्या वेळेत बदल
यवतमाळ : पुढारी वृत्तसेवा; उच्च माध्यमिक व माध्यमिक शालान्त प्रमाणपत्र परीक्षेस प्रविष्ट होणाऱ्या परीक्षार्थ्यांना प्रश्नपत्रिका वाचनासाठी परीक्षा दालनात प्रश्नपत्रिकांचे वाटप परीक्षेच्या निर्धारित वेळेपूर्वी दहा मिनिटे अगोदर करण्यात येत होते. परंतु प्रश्नपत्रिका मोबाईल तसेच अन्य समाज माध्यमातून व्हायरल झाल्याच्या घटना घडल्यामुळे परीक्षेच्या निर्धारित वेळेपूर्वी दहा मिनिटे अगोदर प्रश्नपत्रिका वितरीत करण्याची सुविधा फेब्रुवारी–मार्च २०२३ परीक्षेपासून रद्द केली आहे. त्याएवजी सदरची दहा मिनिटे परीक्षेच्या निर्धारित वेळेनंतर वाढवून देण्यात आली आहेत. परिक्षार्थ्यांनी याची नोंद घ्यावी. असे आवाहन राज्य माध्यमिक व उच्च माध्यमिक शिक्षण मंडळाच्या सचिव अनुराधा ओक यांनी केले आहे. (SSC HSC Exam)
SSC HSC Exam : १० मिनिटे परीक्षेच्या निर्धारित वेळेनंतर
इयत्ता १० वी व १२ वी च्या परीक्षा विद्यार्थ्यांच्या जीवनातील एक महत्वपूर्ण टप्पा. पालक व समाज घटक यांचे या परीक्षांकडे बारकाईने लक्ष असते. परीक्षा प्रक्रियेतील गैरप्रकारांना प्रतिबंध व्हावा तसेच परीक्षा निकोप, भयमुक्त व कॉपी मुक्त वातावरणात सुरळीत पार पडाव्यात यासाठी परीक्षेच्या निर्धारित वेळेपूर्वी दहा मिनिटे अगोदर प्रश्नपत्रिका वितरीत करण्याची सुविधा होती. ती फेब्रुवारी –मार्च २०२३ परीक्षेपासून रद्द केली आहे. तथापि विद्यार्थी हित लक्षात घेवून व पालक, विद्यार्थी यांच्या मागणीचा विचार करुन सदरची दहा मिनिटे परीक्षेच्या निर्धारित वेळेनंतर वाढवून देण्यात आली आहेत. परिक्षार्थ्यांनी परीक्षा केंद्रावर वेळेवर उपस्थित रहावे. फेब्रुवारी-मार्च २०२३ परीक्षेपासून सकाळ सत्रात सकाळी ११ वाजता तसेच दुपार सत्रात दुपारी ३ वाजता परीक्षा दालनात प्रश्नपत्रिकांचे वितरण करण्यात येईल व लेखनास प्रारंभ होईल. असे राज्य मंडळ, पुणे यांच्या कडून कळविण्यात आलेले आहे.
हेही वाचा