धुळे : पिंपळनेरच्या पश्चिम पट्ट्यात भातलागवड सुरु ; चिखलणी करून भातरोपणी
पिंपळनेर: (ता.साक्री) पुढारी वृत्तसेवा
पिंपळनेरच्या आदिवासी पश्चिम पट्ट्यात दमदार पाऊस झाल्याने भातरोपणीला सुरवात झाली असून, चिखलणी करून भात रोपणी करताना शेतकऱ्यांची लगबग सुरू आहे.
पश्चिम पट्ट्यात भातशेती केली जाते. कोकणाप्रमाणेच या भागातही आदिवासी बांधव पारंपरिक पद्धतीने भात शेती करीत आहे. भात शेतीसाठी पिंपळनेरच्या आदिवासी पश्चिम पट्ट्यातील भौगोलिक वातावरण अनुकूल असल्याने येथील तांदुळाला सर्वाधिक मागणी असते. रोपणी भातासाठी अगोदर जमिनीवर छोटे-छोटे वाफे करून त्यात काडी कचरा गोळा करून जमिनीची भाजणी करून त्या ठिकाणी भाताचे रोप टाकली जातात. ते रोप मोठे झाल्यावर जमीन तयार करतात. प्रथम भात लावायचा आहे त्या ठिकाणी त्या जागेला चौहुबाजूने मातीचा उंच बांध बांधून घ्यावा लागतो. त्यानंतर त्या ठिकाणी पावसाचे पाणी साचल्यानंतर चिखलणी करुन त्या ठिकाणी भात रोपणी करतात ते काम शेतकऱ्यांनी सुरू केले आहे.
या भाताची शेतकरी करतायत लागवड
इंद्रायणी, सुकवेल, चिमणसाळ बासमती, खुशबू, भोवाडया, डावाडया, रूपाली, जिरा यासह अनेक विविध जातीचे भाताचे वाण उपलब्ध आहेत. त्यांची लागवड केली जाते. त्यात पिंपळनेरच्या आदिवासी पश्चिम पट्ट्यातील सगळ्यात जास्त पिकवला व विकला जाणारा तांदूळ इंद्रायणी असल्याने इंद्रायणी भाताचे सर्वाधिक क्षेत्र दिसून येत आहे. पिंपळनेर, वार्सा, दहिवेल येथे भरणाऱ्या आठवडे बाजारात या पश्चिम पट्ट्यातील चांगल्या प्रतीचा गावरान तांदूळ विक्रीसाठी उपलब्ध असतो. तसेच तांदळाचा सगळ्यात मोठा बाजार हा पिंपळनेर येथे शुक्रवारी गांधी चौकात असल्याने शेतकरी मोठ्या प्रमाणात तांदूळ विक्रीसाठी आणतात.
अशी करता लागवड…
भात लावायला जास्त पाण्याची गरज असते. म्हणून भात लागवड करतात त्या ठिकाणी पाणी साचविले जाते. त्या शेतीत पाण्यात नांगरणी करून पाटी फिरवली जाते. नंतर पाण्यात भाताची रोपे लावली जातात.
हेही वाचा :