PMC Election Problems: वाहतूक कोंडीला ब्रेक कधी? प्रभाग ७ मधील नागरिकांच्या समस्या ‘जैसे थे’

प्रभाग क्रमांक : 7 गोखलेनगर- वाकडेवाडी

प्रभागात (क्र. 7) उच्चभ्रू सोसायट्या आणि झोपडपट्टीचाही भाग आहे. या प्रभागात काही विकासकामे झाली असली, तरी विविध समस्या आजही कायम आहेत. वाहतूक कोंडी, अपुरा पाणीपुरवठा, पार्किंग, कचरा आणि ड्रेनेज लाइनच्या समस्यांमुळे नागरिकांची गैरसोय होत आहे. गोखलेनगर, पाटील इस्टेट, मुळा रस्ता, वाकडेवाडी येथील झोपडपट्टी भागातील अद्यापही मूलभूत सुविधांची वानवा आहे. तसेच झोपडपट्टी पुनर्विकास प्रकल्पही गेल्या काही वर्षांपासून रखडले आहेत.

या प्रभागात सकाळनगर, गोखलेनगर, वाकडेवाडी, सेनापती बापट रस्ता, गणेशखिंड, संगमवाडी आदी भागचा समावेश आहे. एकीकडे उच्चभ्रू सोसायट्यांची संख्या अधिक, तर दुसरीकडे झोपडपट्टीचाही भाग मोठा आहे. गेल्या काळात प्रभागातील विविध प्रश्न सोडविण्याकडे माजी नगरसेवक आणि महापालिका प्रशासनाचे दुर्लक्ष झाल्याचे नागरिकांचे म्हणणे आहे. विशेषत: झोपडपट्टी भागातील नागरिक आजही मूलभूत सुविधांपासून वंचित आहेत. गोखलेनगर, जनवाडी, पाटील इस्टेट, मुळा रस्ता येथील रहिवाशांना अपुरा पाणीपुरवठा, स्वच्छतागृहांचा अभाव, अस्वच्छता आणि कचऱ्याच्या समस्येचा सामना करावा लागत आहे.

झोपडपट्‌‍ट्यांमधील सांडपाणी व्यवस्थापनाचा प्रश्न गेल्या काही वर्षांपासून ‌’जैसे थे‌’ आहे. वाकडेवाडी येथील भुयारी मार्गात चारचाकी वाहनांना प्रवेश बंद आहे. तरीही या मार्गातून चारचाकी वाहनांची ये-जा सुरू असल्याने वाहतूक कोंडी होत आहे. या ठिकाणी असलेल्या एसटी स्थानकासमोर दररोज वाहतूक कोंडी होत असल्याचे चित्र दिसून येत आहे. तसेच सावित्रीबाई फुले पुणे विद्यापीठ चौकातील वाहतूक कोंडीच्या समस्येला नागरिक वैतागले आहेत. वाहनांच्या गर्दीमुळे पादचाऱ्यांना रस्ता ओलांडणेही कठीण होत आहे. वाहतूक कोंडीची समस्या सुटणार तरी कधी? असा सवाल नागरिकांकडून उपस्थित केला जात आहे.

सकाळनगर, वाकडेवाडी, सेनापती बापट रस्ता आदी भागात विविध विकासकामे झाली आहेत. परंतु रस्त्यांवरील खड्डे आणि वाहतूक कोंडीची समस्या कायम आहे. उच्चभ्रू सोसायट्या असलेल्या भागातील रस्ते आणि पदपथांचे सुशोभीकरण झाले आहे. परंतु झोपडपट्टीच्या भागातील परिस्थिती बिकट आहे. या भागात सार्वजनिक स्वच्छतागृहांचा आभाव आहेत. कचऱ्याचा प्रश्नही गंभीर झाला आहे. वाहनांच्या पार्किंगसाठी जागा उपलब्ध नसल्याने रहदारीस अडथळा होत आहे. आरोग्य केंद्रांचाही आभाव आहे. अपुऱ्या पाणीपुरवठा होत असल्याने नागरिकांची गैरसोय होत आहे. अतिक्रमणांचा प्रश्नही ‌’जैसे थे‌’ आहे. लहान मुलांसाठी क्रीडांगण आणि ज्येष्ठांसाठी विरंगुळा केंद्रांची कमतरता आहे. रस्त्यांच्या दुरवस्थेकडे प्रशासनाचे दुर्लक्ष होत असल्याचे या भागातील नागरिकांनी सांगितले.

प्रभागात या भागांचा समावेश

संगमवाडी, पाटील इस्टेट, वाकडेवाडी, मुळा रस्ता, खैरेवाडी, भोसलेनगर,

सकाळनगर, पंचवटी, गोखलेनगर, जनवाडी, निलज्योती सोसायटी, पत्रकारनगर, सेनापती बापट रस्ता, गणेशखिंड, बाणेर रस्ता, औंधचा काही भाग आदी.

प्रभागातील प्रमुख समस्या

झोपडपट्टी भागामध्ये अद्यापही मूलभूत सुविधांचा अभाव

वाकडेवाडी एसटी बसस्थानकासमोर,

भुयारी मार्गात होणारी वाहतूक कोंडी

प्रकल्पांच्या देखभाल, दुरुस्तीकडे महापालिका प्रशासनाचे दुर्लक्ष

विद्यापीठ चौकात वाहतूक कोंडी होत असल्याने नागरिकांची गैरसोय

मुख्य आणि अंतर्गत रस्त्यांवर काही ठिकाणी पदपथांचा अभाव

प्रभागात झालेली विकासकामे

सेनापती बापट रस्त्यावर प्रशस्त पदपथ

ड्रेनेज लाइन आणि रस्त्याचे काँक्रिटीकरण

संगमवाडी येथील जुन्या स्मशानभूमीचे नूतनीकरण

सुरक्षेसाठी ठिकठिकाणी सीसीटीव्ही यंत्रणा कार्यन्वित

ई-लायबरी प्रकल्पासह ज्येष्ठ नागरिकांसाठी वाचनालये.

वाहतूक सुरळीत होण्यासाठी या उपाययोजना गरजेच्या

शिवाजीनगर मेट्रो स्थानकाच्या कामासाठी वाकडेवाडी येथे स्थलांतरित केलेले एसटी बसस्थानक पुन्हा जुन्या जागी हलविण्याची आवश्यकता आहे. त्यामुळे पुणे-मुंबई महामार्गावरील वाहतूक कोंडीची समस्या सुटण्यास मदत होईल. तसेच भुयारी मार्गातील वाहतूक कोंडीवर उपाययोजना होणे गरजेचे आहे. सावित्रीबाई फुले पुणे विद्यापीठ परिसरातील मेट्रोचे काम पूर्ण करून येथील उड्डाणपूल वाहतुकीसाठी लवकरात लवकर खुला करण्याची आवश्यकता आहे. सध्या या ठिकाणी एक लेन सुरू असल्याने वाहतूक कोंडीचा त्रास नागरिकांना सहन करावा लागत आहे.