पिंपरी : सायबर गुन्ह्याचे बँकॉक कनेक्शन : सायबर सेलकडून चौघांना अटक

By:Laxman Dhenge Published on: March 26, 2024, 2:32 PM

पिंपरी : पुढारी वृत्तसेवा : शेअर मार्केटमध्ये गुंतवणूक करण्याच्या बहाण्याने महिलेची दहा लाख 69 हजार 575 रुपयांची फसवणूक करण्यात आली. वाकड पोलिस ठाण्यात दाखल असलेल्या या गुन्ह्यात सायबर सेलने चौघांना अटक केली आहे. पोलिस तपासात या प्रकरणाचे बँकॉक कनेक्शन असल्याचे समोर आले आहे. विकास नेमीनाथ चव्हाण (43, रा. गणेशनगर, नवी सांगवी), प्रदीप कृष्णा लाड (32, रा. पिंपळे गुरव, सांगवी), अमित जगदीशचंद्र सोनी, अहमद नजीर गाझी, अशी अटक करण्यात आलेल्या आरोपींची नावे आहेत.
पोलिस उपायुक्त संदीप डोईफोडे यांनी दिलेल्या माहितीनुसार, वाकड येथील एक महिला फेसबुकवर पोस्ट बघत असताना तिला आयबीकेआर क्रेसेट अकादमी गोल्डमन सच, या नावाने व्हॉट्सअ‍ॅप ग्रुप दिसला.

त्यावर क्लिक केले असता महिला ग्रुपला जॉईन झाली. ग्रुपमध्ये असलेल्या सदस्यांना दररोज गुंतवणुकीवर नफा होत असल्याचे फिर्यादी यांना दिसले. त्यामुळे महिलेने देखील आयबीकेआर सेक्युरिटीज या कंपनीत पैसे गुंतवण्याची तयारी दर्शवली. दरम्यान, आरोपींनी महिलेला लिंक पाठवून एक अ‍ॅप डाउनलोड करण्यास सांगितले. त्यावर महिलेने केलेली गुंतवणूक आणि नफा दिसत होता. मात्र, महिलेला पैसे काढता येत नव्हते. आपली फसवणूक होत असल्याचे महिलेच्या लक्षात आले. महिलेने वाकड पोलिसात धाव घेत दहा लाख 69 हजार 575 रुपयांची फसवणूक झाल्याची तक्रार दिली. यांनी केली कामगिरी पोलीस उप-आयुक्त संदिप डोईफोडे, सहायक पोलिस आयुक्त विशाल हिरे यांच्या मार्गदर्शनाखाली वरिष्ठ पोलिस निरीक्षक वैभव शिंगारे,
सहायक पोलिस निरीक्षक सागर पानमंद, सहायक पोलिस निरीक्षक प्रविण स्वामी, पोलिस उपनिरीक्षक सागर पोमन, पोलिस अंमलदार अतुल लोखंडे यांच्या पथकाने ही कामगिरी केली.

सायबर पोलिसांनी तांत्रिक विश्लेषण करून आरोपींची ओळख पटवली. आरोपी विकास चव्हाण, प्रदीप लाड यांना सायबर सेलने सांगवी परिसरातून अटक केली. आरोपी फसवणुकीच्या पैशातून गुजरात येथील सोनाराच्या दुकानातून सोने खरेदी करत असल्याची माहिती सायबर सेलचे सहायक पोलिस निरीक्षक प्रविण स्वामी यांना माहिती मिळाली.
या माहितीच्या आधारे आणि फिर्यादी महिलेने आरोपीच्या अकाउंटला भरलेले पैसे यांचे तांत्रिक विश्लेषण करुन गुजरातमधून आरोपी अमित जगदीशचंद्र सोनी याला पोलिसांनी ताब्यात घेतले. आरोपी सोनी याच्याकडे चौकशी केली असता, सोन्याच्या व्यापार्‍यांकडून आपण सोने घेतो. त्यानंतर त्याचे रोख रकमेत रूपांतर करतो.
तसेच, रोख रक्कम सोनी हा अहमद नजीर गाझी याला देत असल्याची कबुली त्याने दिली. त्यानंतर आरोपी अहमद नजीर गाझी रोख रक्कम मुफ्दल आणि त्याचा भाऊ आबिद याला यूएसडीटीमध्ये क्रिप्टोकरन्सी खरेदी करून पाठवत असल्याचे समोर आले.

आंतरराष्ट्रीय गुन्हेगारी टोळीसोबत काम

आरोपी अहमद याचा सख्खा भाऊ आबिद आणि मुफ्दल हे दोघे बँकॉकमध्ये राहतात. दोघेही आंतराष्ट्रीय गुन्हेगारी टोळीसोबत काम करत असल्याचे तपासात निष्पन्न झाले आहे. आरोपींनी आत्तापर्यंत सहा खात्यांतील पैसे काढून रोख रक्कम ‘युएसडीटी’मध्ये बँकॉकला पाठविल्याचे समोर आले आहे. आरोपीच्या एकूण सहा बँक खात्याविरोधात भारतामध्ये एकूण 177 तक्रारी अर्ज पोलिसांकडे आले आहेत. यामध्ये तब्बल 100 कोटींपेक्षा जास्त रकमेची फसवणूक झाली आहे.

हेही वाचा