England Shameful World Record : इंग्लंडच्या नावावर ‘या’ लाजिरवाण्या विक्रमाची नोंद!
पुढारी ऑनलाईन डेस्क : England Shameful World Record : आयसीसी वनडे विश्वचषक स्पर्धेत इंग्लंडला अफगाणिस्तानकडून 69 धावांनी लाजिरवाण्या पराभवाला सामोरे जावे लागले. जोस बटलरच्या नेतृत्वाखालील इंग्लिश संघ मोठ्या अपसेटचा बळी ठरला. दिल्लीतील अरुण जेटली स्टेडियमवर झालेल्या मानहानीकारक पराभवानंतर इंग्लंडच्या नावावर एक लाजिरवाणा विक्रम नोंदवला गेला आहे. विश्वचषकाच्या इतिहासातील सर्व कसोटी खेळणाऱ्या देशांकडून पराभूत झालेला इंग्लंड हा पहिला संघ ठरला.
यंदा अफगाणिस्तानने विश्वचषकातील सलग पराभवाची मालिका संपुष्टात आणली. सलग 14 पराभवानंतर या संघाने पहिला विजय नोंदवला. यापूर्वी अफगाणिस्तानने त्यांचा शेवटचा विजय फेब्रुवारी 2015 मध्ये स्कॉटलंडविरुद्ध मिळवला होता. अफगाणिस्तानने वर्ल्ड कपमध्ये एकूण 18 सामने खेळले, त्यापैकी 2 जिंकले आहेत. (England Shameful World Record)
Pure joy 🥰 🇦🇫#CWC23 #ENGvAFG pic.twitter.com/JzQWnodTlD
— ICC (@ICC) October 15, 2023
इंग्लंडच्या पराभवाचा इतिहास (England Shameful World Record)
इंग्लंडला 1975 च्या विश्वचषकात ऑस्ट्रेलियाविरुद्ध पहिला पराभव पत्करावा लागला होता. यानंतर 1979 च्या विश्वचषकाच्या फायनलमध्ये इंग्लंडला वेस्ट इंडिजने मात दिली. 1983 आणि 1987 मध्ये इंग्लंडला भारत आणि पाकिस्तान या आशियाई संघांनी पराभवाची धूळ चारली. न्यूझीलंडने 1983 मध्ये विश्वचषक स्पर्धेत पहिल्यांदा इंग्लंडवर विजय मिळवला होता. तर 1992 इंग्लिश संघाला मोठा धक्का बसला होता. त्या स्पर्धेत झिम्बाब्वेने इंग्लंडला चितपट करून सर्वांनाच चकित केले होते. त्यानंतर 1996 च्या विश्वचषकात श्रीलंका आणि दक्षिण आफ्रिकेने इंग्लंडचा पराभव केला होता. 2011 च्या विश्वचषकात बांगलादेश आणि आयर्लंडने इंग्लंडला पराभवाची कडू चव चाखण्यास भाग पाडले होते. तर आता 2023 मध्ये सुरू असलेल्या विश्वचषक स्पर्धेत अफगाणिस्तानने इंग्लंडची धुळधाण उडवून दिली आहे. अशा प्रकारे, इंग्लंड क्रिकेट संघाने विश्वचषकाच्या इतिहासात सर्व 11 कसोटी खेळणाऱ्या देशांकडून पराभव पत्करण्याचा लाजिरवाणा विक्रम नोंदवला आहे.
इंग्लंडचा संघाचे प्रथमच फिरकीपुढे लोटांगण (England Shameful World Record)
वर्ल्डकपच्या इतिहासात इंग्लंड संघाने पहिल्यांदाच फिरकीपुढे लोटांगण घातल्याचे पहायला मिळाले. अफगाणविरुद्धच्या सामन्यात इंग्लंडचे 8 फलंदाज फिरकीच्या जाळ्यात अडकले. यात फिरकी गोलंदाज मुजीब उर रहमान आणि राशिद खान यांनी प्रत्येकी 3, तर मोहम्मद नबीने 2 बळी घेतले.
विश्वचषकात सर्वाधिक संघांकडून पराभव पत्करणारा संघ
11 : इंग्लंड
10 : वेस्ट इंडिज
9 : दक्षिण आफ्रिका
8 : ऑस्ट्रेलिया
8 : भारत
8 : पाकिस्तान
8 : श्रीलंका
7 : न्यूझीलंड
विश्वचषकात सर्वाधिक सलग पराभवांचा विक्रम
18 : झिम्बाब्वे (1983-1992)
14 : स्कॉटलंड (1999-2015)
14 : अफगाणिस्तान (2015-2023)
11 : कॅनडा (2003-2011)
10 : नेदरलँड (1996-2003)
अफगाण फिरकीपटूंनी विश्वचषक सामन्यात घेतल्या सर्वाधिक विकेट्स
8 विकेट्स विरुद्ध इंग्लंड, दिल्ली (2023)
6 विकेट्स विरुद्ध श्रीलंका, कार्डिफ (2019)
5 विकेट्स विरुद्ध भारत, साउथॅम्प्टन (2019)
5 विकेट्स विरुद्ध पाकिस्तान, लीड्स (2019)