Summer Fruits : उष्णता कमी करण्यासाठी ‘ही’ फळे गुणकारी

मार्च महिना संपण्यापूर्वीच उन्हाने ‘मी’ म्हणण्यास सुरुवात केली आहे. त्यामुळे पुढे किती कडक उन्हाळा असेल याची जणूकाही झलकच पाहायला मिळत आहे. उष्णता प्रचंड वाढल्यामुळे डिहायड्रेशन किंवा इतर हंगामी आजारांचा त्रास होऊ शकतो. आपण आपल्या रोजच्या आहारात काही असे पदार्थ खातो ज्याने आपल्या शरीरातील उष्णता ही आणखीच वाढते. अशा स्थितीत शरीरातील उष्णता कमी करण्यासाठी काही हंगामी फळे (Summer Fruits) अतिशय उपयुक्त ठरतात. या फळांची ही माहिती…

कलिंगड : कलिंगड हे उन्हाळ्यातील सर्वोत्तम फळ मानले जाते. त्यामुळे उन्हाळ्यात या फळाचे सेवन नक्की करावे. कलिंगडात 90 टक्क्यांपेक्षा जास्त पाणी असते. ज्यामुळे शरीरातील पाण्याची कमतरता दूर होते. कलिंगड हे शरीराला थंडावा देणारे अँटिऑक्सिडेंट आहे. (Summer Fruits)

लिंबू : उन्हाळ्यात लिंबू पाण्यामुळे तुमचे शरीर थंड राहते आणि तुम्ही ताजेतवाने राहता. दिवसातून दोनदा हलक्या साखरेसोबतही त्याचे सेवन करू शकता. त्यामुळे वजन कमी होण्यासही मदत होते. तसेच उन्हाळ्यात शरीराला थंड ठेवण्यासाठी पुदिना हा एक चांगला पदार्थ आहे. तुम्ही दही, ताक किंवा रायतामध्ये पुदिना मिक्स करू शकता. त्यामुळे शरीर थंड राहण्यास मदत होते.

जांभूळ : जांभूळ हे फळ उन्हाळ्यात हमखास खायला मिळतं. चवीला आंबट-गोड व रसरशीत अशी लांबट आकाराचे जांभूळ आरोग्यासाठी फायदेशीर असतात. या फळात लोह, कॅल्शिअम, फॉस्फरस, ‘क’ जीवनसत्त्व यांचे प्रमाण अधिक असते. ज्यामुळे शरीराला पोषकत्व मिळते. लोहामुळे कावीळ, रक्तदोषाविकार हे आजार लवकर बरे होतात. जांभळाचे बी व साल यांचे चुर्ण मधुमेह या आजारावर अत्यंत उपयुक्त आहे. दात व हिरड्या कमकुवत झाल्या असतील व त्यातून रक्त येत असेल तर त्यावरही जांभळाच्या सालीचा वापर केला जातो. जांभळाच्या सरबतामुळे पोट साफ होण्यास मदत होते. पण, जांभळे खाताना नेहमी काळजी घ्यावी, रिकाम्या पोटी जांभळे खाऊ नयेत.

करवंद : ‘डोंगरची काळी मैना’ म्हणून ओळखले जाणारे ‘करवंद’ या रानमेव्यात अनेक औषधी गुणधर्म आहेत. यात ‘क’ जीवनसत्त्व मोठ्या प्रमाणात आहे, जे त्वचाविकारामध्ये अधिक फायदेशीर ठरते. शिवाय यात मोठ्या प्रमाणात सायट्रिक अ‍ॅसिड असल्याने या दिवसांत उष्णतेमुळे होणार्‍या अनेक आजारांवर करवंद फायदेशीर आहेत. या दिवसात उष्णतेमुळे शरीराची काहिली होते तेव्हा करवंदाचे सरबत प्यायल्याने अधिक आराम मिळतो. करवंदामध्ये फायबरदेखील भरपूर प्रमाणात असते. त्यामुळे पोट साफ होण्यास मदत होते. करवंदामध्ये कॅल्शिअमही भरपूर प्रमाणात असल्याने हाडांसाठीदेखील करवंद उत्तम आहेत. (Summer Fruits)