गुलाब आरोग्यासाठीही ठरतो गुणकारी!

नवी दिल्ली : गुलाबाला फुलांचा राजा म्हटले जाते ते सार्थच आहे. विशेषतः फेब्रुवारीमध्ये गुलाबाला अतिशय महत्त्व येत असते. प्रेमीयुगुलांसाठी फेब्रुवारी महिना खूप खास मानला जातो. व्हॅलेंटाईन वीक म्हणजे 7 ते 14 फेब्रुवारी हा प्रत्येक दिवस प्रेम साजरा करण्यासाठी असतो. याची सुरुवात 7 फेब्रुवारी रोजी ‘रोज डे’ने होते. यामध्ये जोडपे एकमेकांना गुलाबाचे फूल देऊन आपले प्रेम व्यक्त करतात. पण तुम्हाला माहीत आहे का की गुलाब केवळ प्रेमासाठीच नाही तर उत्तम आरोग्यासाठीही महत्त्वाचा आहे. गुलाबाची फुले प्राचीन काळापासून विविवध रोगांवर उपचार करण्यासाठी वापरली जातात. अनेक प्रकारच्या उपचारांमध्येही गुलाबाच्या पाकळ्यांचा वापर करण्यात आला आहे. गुलाबाचे फूल तुम्हाला अनेक आरोग्यदायी फायदे देऊ शकते हे जाणून तुम्ही थक्क व्हाल.

चमकदार त्वचा : अभ्यासात असे दिसून आले आहे की गुलाबाच्या पाकळ्या त्वचेसाठी खूप फायदेशीर आहेत. साबण आणि अनेक सौंदर्यप्रसाधनांमध्ये गुलाबाच्या वापराबाबतही तुम्ही अनेकदा ऐकले असेल. संशोधनात असे दिसून आले आहे की गुलाब नैसर्गिकरीत्या अँटिबॅक्टेरियल आहे. गुलाबामध्ये अनेक प्रकारचे फायटोकेमिकल्स देखील असतात, जे मुरुम कमी करण्यासाठी आणि त्वचेचा रंग सुधारण्यासाठी उपयुक्त मानले जातात. त्वचेच्या समस्यांसाठीही गुलाबपाणी वापरण्याची शिफारस केली जाते.

वाढत्या वयाला ब्रेक : त्वचेला दीर्घकाळ तरुण ठेवण्यासाठीही गुलाब अत्यंत फायदेशीर मानले जाते. त्यामुळेच हे अनेकदा सौंदर्यप्रसाधनांमध्ये मिसळले जाते. गुलाबाच्या तेलामध्ये भरपूर प्रमाणात अँटिऑक्सिडंट असतात जे त्वचेवरील वृद्धत्वाची चिन्हे कमी करण्यास मदत करतात. हे मुक्त रॅडिकल्सशी लढा देऊन त्वचा दीर्घकाळ निरोगी ठेवण्यास मदत करते. त्वचेची आर्द्रता टिकवून ठेवण्यासाठी आणि सुरकुत्या घालवण्यासाठीही गुलाबाचे तेल फायदेशीर मानले जाते.

मानसिक आरोग्यासाठी गुलाबाचे फायदे : गुलाबाच्या पाकळ्या तणाव कमी करण्यास आणि मन शांत करण्यास मदत करतात. संशोधनात असे दिसून आले आहे की आंघोळीच्या पाण्यात किंवा बाथटबमध्ये गुलाबाच्या पाकळ्या टाकल्याने तणाव, चिंता आणि नैराश्याची लक्षणे कमी होण्यास मदत होते. अनावश्यक चिडचिडेपणा कमी करण्यासाठी देखील हे उपयुक्त आहे. आयुर्वेदामध्ये गुलाबाला लैंगिक क्रियाकलाप वाढविण्यात मदत करणारे मानले जाते, जे हृदय, मन आणि मज्जासंस्था योग्यरीत्या कार्य करण्यास मदत करते.

वजन कमी करण्यासाठी गुलाबाचे फायदे : तुम्ही कधी विचार केला आहे का की गुलाब देखील वजन कमी करण्यासाठी उपयुक्त ठरू शकतो? अभ्यास दर्शवते की गुलाबाच्या पाकळ्यांमध्ये संयुगे असतात जे चयापचय सुधारतात आणि वजन वाढण्यास प्रतिबंध करतात. गुलाबाच्या पाकळ्यांचे सेवन शरीरातील विषारी पदार्थ काढून टाकण्यासही मदत करते.