संपूर्ण शरीरावर टॅटू काढण्याचा दाम्पत्याचा अनोखा विक्रम

ब्युनोस आयर्स ः अर्जेंटिनामधील एका मुलखावेगळ्या जोडप्याने आपली वेगळी ओळख निर्माण करण्यासाठी संपूर्ण शरीरावर टॅटू काढून घेतले. त्यांनी त्यांच्या शरीराच्या काही भागावर नाही तर संपूर्ण शरीरावर टॅटू काढले आहेत. इतकेच नाही तर त्यांची शरीराचं बॉडी मॉडिफिकेशन देखील करून घेतलं आणि या जोडप्याने आपल्या शरीरामध्ये 98 बदल करत आणि संपूर्ण शरीरावर टॅटू गोंदवत ‘गिनिज वर्ल्ड रेकॉर्ड’ बनवला आहे.

अर्जेंटिनातील गॅब्रिएला आणि व्हिक्टर यांची भेट 24 वर्षांपूर्वी झाली. गॅब्रिएला आणि व्हिक्टर यांची एका मोटारसायकल कार्यक्रमात भेट झाली आणि दोघांचं आयुष्यच बदललं. तेव्हाच या दोघांचं पहिल्या नजरेत एकमेकांवर प्रेम जडलं. त्यांच्या लग्नाला 13 वर्षे पूर्ण झाली आहेत. हे जोडपं आपलं आयुष्य इतरांपेक्षा वेगळ्याप्रकारे जगतात. या जोडप्याने आपल्या संपूर्ण शरीरावर टॅटू गोंदवले आहेत. डोळे आणि जीभेवरही त्यांनी टॅटू गोंदवले आहेत. व्हिक्टरने बॉडी मॉडिफिकेशन करत त्यांची जीभेचे दोन भाग केले आहेत, शिवाय कानाचा आकारही बदलला आहे.

गॅब्रिएलानेही संपूर्ण शरीरावर टॅटू गोंदवले आहेत. गॅब्रिएला आणि व्हिक्टर या जोडप्याने आपल्या शरीरावर शस्त्रक्रिया करून वेगवेगळे बदल केले आहेत. गेली 24 वर्षे बॉडी मॉडिफिकेशन करण्यात त्यांनी घालवली आहेत. व्हिक्टरने याबाबत प्रतिक्रिया देत म्हटलं आहे की, ‘माझ्यासाठी गिनिज वर्ल्ड रेकॉर्ड धारक असणं हे माझ्या शरीरावरील कलेबद्दल आणि प्रेमाबद्दल मला मिळालेला पुरस्कार आहे.