चर्चा अनोख्या लग्नाची; अनाथ दिक्षाचे कारखेडा ग्रामपंचायतीने लावले लग्न
वाशिम : अजय ढवळे
वाशीम जिल्ह्यातील कारखेडा येथे एक अनोखा विवाह सोहळा पार पडला आहे. आई वडिलांचे छत्र हरविलेल्या दिक्षाच्या विवाहाला सामाजिक दिशा देत कारखेडा ग्रामपंचायतने कुटुंबाचे कर्तव्य पार पाडीत मानोर्‍याचे ठाणेदार यांनी सपत्नीक कन्यादान करीत दिक्षाच्या आई वडीलांची भूमिका निभाविल्याने या अगळ्या वेगळ्या लग्न सोहळ्याची सर्वत्र चर्चा होत असून, ग्रामपंचायतीचे सर्वत्र कौतुक केले जात आहे.
मानोरा तालुक्यातील कारखेडा येथील दीक्षा डाखोरे यांच्या वडिलांच 15 वर्षांपूर्वी निधन झाले. त्यानंतर तिच्या आईने तिचा सांभाळ केला. मात्र, कालांतराने आईचेही निधन झाले. परिस्थितीमुळे अनाथ झालेल्या मुलीस ग्रामपंचायतीने दत्तक घेतले आणि त्यांचा सांभाळ केला. मुलगी उपवर झाल्यामुळे तिचा विवाह नांदेड जिल्ह्यातील पळसा येथील निखिल गावंडे यांच्याशी जुळला. मात्र लग्नाची जबाबदारी कुणी घ्यायची हा प्रश्न निर्माण झाला. त्यानंतर ग्रामपंचायतीने मासिक सभा घेऊन लग्नाचा खर्च करण्याच ठरविलं.
कारखेडा येथे एका अनाथ मुलीचं लग्न ठरलं हे माहीत झाल्यावर मनोऱ्याचे ठाणेदार शिशीर मानकर यांनी स्वत: ग्रामपंचायतीशी संपर्क साधून आपण या मुलीचं कन्यादान करु इच्छितो अशी विचारणा केली. ग्रामपंचयतीनेही त्यांच्या इच्छेचे स्वागत करत त्यांच्यावर कन्यादानाची जबाबदारी सोपवली. तर विस्तार अधिकारी संजय भगत यांनी या मुलीच्या लग्नात आपण मामा होऊन लग्नात सहभागी होत असल्याचे फोन वरुन ग्रामपंचायतीस कळवले.
अशा प्रकारे समाजातील ही मोठी माणसे मायेचे छत्र हरवलेल्या मुलीच्या आनंदात सहभागी होत तिला मोठा आधार दिला. सध्या या अनोख्या विवाहाची सर्वत्र मोठी चर्चा होत आहे. राज्यभरात आई वडिलांचे छत्र हरविलेले अनेक अनाथ मुलं मुली असून, त्यांची हेळसांड होताना आपण बघतो. मात्र कारखेडा ग्रामपंचायतने अशा अनाथ मुलांना दत्तक घेवून त्यांची सर्वच जबाबदारी घेत आहे. तर आज अशाच एका अनाथ दिक्षाचं लग्न करून कुटुंब प्रमुखांची भूमिका पार पाडली. यांच्याप्रमाणेच राज्यातील इतर ग्रामपंचायतींनी हा आदर्श घेतला तर अनाथ मुलांना खरा न्याय मिळेल यात मात्र शंका नाही.
मी स्वतःहून कन्यादान करण्याचं ठरवलं. मला मुलगी नसल्याने माझ्या हाताने हे कन्यादान करण्याची इच्छा मी ग्रामपंचायतीकडे व्यक्त केली. आज मी दिक्षाचं कन्यादान केल्यामुळं मला एक मुलगी असल्याची जाणीव झाली. – ठाणेदार शिशिर मानकर
दीक्षा डाखोरे या अनाथ मुलीचं लग्न ठरल्याचे समजल्यावर मी सरपंच याना फोन करून मुलीचा मामा होऊन मी लग्नात सहभागी होणार असल्याचे म्हटले आणि मला ती संधी मिळाली. ही संधी मला मिळाली हे मी माझं भाग्य समजतो. – संजय भगत, विस्तार अधिकारी
लहानपणी माझ्या वडिलांचा मृत्यू झाला. तर काहि दिवसांपूर्वीच आईचेही निधन झाले. त्यामुळं माझं लग्न कसं होईल असा प्रश्न निर्माण झाला होता. मात्र ग्रामपंचायतीने माझ्या लग्नाचा खर्च केला, तर वडील म्हणून ठाणेदार यांनी भूमिका पार पाडली. यांच्या निमित्ताने मला पुन्हा माझे आई वडीलच मिळाले. – दीक्षा डाखोरे, नववधू