कराड : मध्यरात्री भीषण आगीत २४ घरे जळाली; ४ सिलेंडरच्या स्फोटाने परिसर हादरला

कराड ; पुढारी वृत्तसेवा 

कराड बसस्थानकापासून जवळच असलेल्या परिसरातील वस्तीला मध्यरात्री अचानक भीषण आग लागली. रौद्ररूप धारण केलेल्या या आगीत चार सिलेंडरचा स्फोट झाल्याने संपुर्ण परिसर हादरून गेला. वस्तीतील महिलांसह कराड न्यायालयाच्या सुरक्षा रक्षकाच्या प्रसंगावधानामुळे सुदैवाने जीवितहानी झाली नाही. परंतु, या भयावह आगीत २४ घरे जळून खाक झाली आहेत. तर काही जण किरकोळ जखमी झाले आहेत.

• शिवजयंती विशेष : शिवछत्रपतींच्या लोककल्याणकारी राज्याचे अधिष्ठान

घटनास्थळावरून मिळालेल्या माहितीनुसार, कराड येथे बसस्थानकापासून जवळच असलेल्या वस्तीत मध्यरात्री अचानक आग लागली. एका घराला लागलेली आग वेगाने वाढत गेली. आग लागल्याने महिलांसह नागरिक आरडाओरडा करत रस्त्यावर आले. त्या महिलांसह आसपासच्या नागरिकांनी आग लागलेल्या घरांशेजारील इतर घरात झोपलेल्या कुटुंबांना जागे करत बाहेर आणले. तोपर्यंत आग प्रचंड वाढत गेली.

• कोल्हापूर विमानतळाचे नामकरण ‘राजाराम महाराज’ असेच होणार

आगीच्या भडक्यात चार घरातील सिलेंडरचा स्फोट झाल्याने हा परिसर हादरून गेला. सिलेंडरच्या स्फोटाचा मोठा आवाज झाल्याने शहरात खळबळ उडाली. आग आटोक्यात आणण्यासाठी नागरिकांसह पोलिसांनी प्रयत्न सुरू केले. अग्निशमन दलाच्या गाड्या घटनास्थळी दाखल झाल्या. मात्र तोपर्यंत आगीत २४ घरांतील साहित्य जळून खाक झाले होते. उपविभागीय पोलीस अधिकारी रणजीत पाटील, वरिष्ठ पोलीस निरिक्षक बी. आर. पाटील, मुख्याधिकारी रमाकांत डाके यांनी घटनास्थळी धाव घेतली. अथक प्रयत्नानंतर आग आटोक्यात आली. या आगीमुळे अनेक संसार उघड्यावर आले आहेत. त्यांची तात्पुरती राहण्याची सोय नगरपरिषद शाळा क्रमांक तीन येथे केली आहे.

• छत्रपती शिवरायांचे अस्सल चित्र!