झारखंड: 'या' समुदायाच्या 50 कुटुंबांना मारहाण करत गावातून हाकलले...वाचा पुढे काय घडले?

झारखंड : झारखंडमधील मुरुमाटू गावातून एकाच समुदायातील सुमारे ५० कुटुंबांना कथितरित्या हाकलून देण्यात आले, असे पोलिसांनी मंगळवारी सांगितले. मिळालेल्या माहितीनुसार, झारखंडच्या पलामू जिल्ह्यात गेल्या चार दशकांपासून राहणाऱ्या कुटुंबांना एका विशिष्ट समुदायाच्या सदस्यांनी हाकलून लावले होते.

माहिती मिळताच, उपविभागीय अधिकारी (एसडीओ), मेदिनीनगर, राजेश कुमार साह आणि उपविभागीय पोलीस अधिकारी (एसडीपीओ), बिश्रामपूर, सुरजित कुमार यांनी मुरुमाटू गावापासून 1 किमी अंतरावर असलेल्या टोंगरी पहाडी भागात धाव घेतली.
कायदा व सुव्यवस्था राखण्यासाठी अधिकारी या भागात थांबले, असे पोलिसांनी सांगितले. या संदर्भात 12 नामांकित लोक आणि इतर 150 जणांवर फौजदारी गुन्हा दाखल करण्यात आला आहे, असे त्यांनी सांगितले. दरम्यान, झारखंडचे राज्यपाल रमेश बैस यांनी या घटनेवर चिंता व्यक्त केली आहे.

राज्यपालांनी पलामूचे उपायुक्त ए दोड्डे यांच्याकडून दोन दिवसांत सविस्तर अहवाल मागितला आहे, असे राजभवनच्या निवेदनात म्हटले आहे.

दोड्डे म्हणाले की, पोलिसांना दोषींना तात्काळ पकडण्यास सांगितले आहे. डीसींनी सर्व 50 कुटुंबांचे त्याच गावात प्राधान्याने पुनर्वसन करण्याचे आश्वासन दिले. यासाठी मदत संस्था सक्रिय करण्यात आल्या आहेत, असेही दोडे यांनी सांगितले.

पीडित सर्व ‘मुसार’ जातीतील असून गेल्या चार दशकांपासून ते गावात राहत होते. जितेंद्र मुशार या पीडितांपैकी एकाने सांगितले की, “आम्ही अनेक वर्षांपासून गावात एकत्र राहत होतो, परंतु काही लोकांनी, सर्व मारुमातु गावातील रहिवासी, आम्हाला सोमवारी जबरदस्तीने गावाबाहेर काढले. त्यांनी आमचे सामान वाहनात भरले आणि आम्हाला एका गाडीत टाकून जवळच्या जंगलात सोडले.”

या संदर्भात पोलिसांकडे जाण्यापासूनही त्यांना मारहाण करण्यात आल्याचा आरोप त्यांनी केला. एसडीपीओ म्हणाले की, आरोपींना दलित राहत असलेली जमीन शैक्षणिक संस्थेची असल्याचे सिद्ध करण्यासाठी कागदपत्रे सादर करण्यास सांगितले आहे.

त्याच ठिकाणी त्यांचे पुनर्वसन करण्याची व्यवस्था करण्यात येत असल्याचे कुमार यांनी सांगितले. एसडीपीओने असेही सांगितले की आरोपींविरुद्ध एफआयआर नोंदवण्यात आला आहे आणि त्यांना पकडण्यासाठी मोठ्या प्रमाणावर शोध सुरू आहे.

एसडीओ म्हणाले की, पीडितांची घरे पाडण्यात आली आहेत, परंतु त्यांचे पुनर्वसन त्याच ठिकाणी पुरेशा सुरक्षा व्यवस्थेसह केले जाईल. दोषींना सोडले जाणार नाही आणि आरोपींवर कायदेशीर कारवाई केली जाईल, असे आश्वासन त्यांनी पीडित कुटुंबांना दिले.

हे ही वाचा :

झारखंड : एकतर्फी प्रेमातून घरात घुसून १७ वर्षीय तरुणीला पेटवले; पीडितेच्या मृत्यूनंतर शहरात तणाव

झारखंडमधील सत्तासंघर्ष : ‘फूट’ टाळण्‍यासाठी सत्ताधारी आघाडीचे आमदार छत्तीसगडला रवाना