नंदुरबार : ११ गर्भवती महिलांना घेऊन जाणारी रुग्णवाहिका उलटली

नंदुरबार: पुढारी वृत्तसेवा : गर्भवती महिलांची तपासणी करून त्यांना घरी नेणारी रुग्णवाहिका अचानक उलटली. यात गर्भवती महिलांसह चालक जखमी झाला. ही घटना शहादा तालुक्यातील लोणखेडा येथील महाविद्यालयासमोर बुधवारी (दि. १ फेब्रुवारी) घडली. गर्भवती महिलांना गंभीर दुखापत झाली आहे. सुदैवाने मोठा अनर्थ टळला.

मिळालेल्या माहितीनुसार, धडगाव तालुक्यातील अतिदुर्गम भागातील तेलखेडी आरोग्य केंद्रात ११ गर्भवती महिलांना तपासणीसाठी रुग्णवाहिकेतून आणण्यात आले होते. महिलांना परत घरी नेताना ही रुग्णवाहिका लोणखेडा येथे महाविद्यालयासमोर अचानक उलटली. मोठा आवाज आणि महिलांच्या किंकाळ्या ऐकून नागरिकांनी घटनास्थळी धाव घेतली. त्यांनी महिलांना सुखरूप बाहेर काढले. तातडीने त्यांना शहादा जिल्हा उपरुग्णालयात दाखल करण्यात आले.

तीन महिलांना फ्रॅक्चर झाले आहे. तर दोन-तीन महिलांच्या डोक्याला मार बसला आहे. दरम्यान या अपघाताची माहिती मिळताच आरोग्य विभागाच्या आणि पोलीस ठाण्याच्या अधिकाऱ्यांनी शहादा उप रुग्णालयात धाव घेतली.

हेही वाचलंत का ? 

• नाशिक : पोलीसांच्या सजगतेमुळे अवघ्या काही तासात बालक पालकांच्या कुशीत
• नाशिकच्या कुंभमेळ्यात पर्यटकांसाठी ‘बजेट हॉटेल’ ; भुजबळांचे मुख्य सचिवांना पत्र
• नाशिक : बंद क्रेडिट कार्ड सुरु करून देतो म्हणत भामट्याचा माजी सैनिकाला एक लाखाचा गंडा