जळगाव पुढारी वृत्तसेवा : जळगाव येथील पारोळा शहरातील हवलदार मोहल्ला परिसरात आज सकाळी कमरेपासून भाग तुटलेल्या अवस्थेत एक नवजात मृत स्थितीत अर्भक आढळून आला आहे. त्यामुळे पारोळा शहरात खळबळ उडाली आहे.
मिळालेली माहिती अशी की, शहरातील हवलदार मोहल्ला परिसरात राहणारे इबा (पुर्ण नाव माहिती नाही) यांच्या घरातील महिला आज सकाळी १० वाजता कपडे छतावर टाकण्यासाठी गेले असता त्यांना कमरेपासून पाय नसलेल्या स्थितीत एका नवजात अर्भकाचा मृतदेह आढळून आला.
या घटनेमुळे पारोळा शहरात खळबळ उडाली आहे. नेमके हे बालकाच्या पालकांचा थांग पत्ता लागलेला नसला तरी घराच्या छतावर त्याला कुणी आणून टाकले ? कमरेखालचे शरीर छतावर आणून टाकण्यापूर्वी तुटलेले होते की छतावर कुत्र्यांनी त्याचे लचके तोडले ?
काहीही झाले तरी अश्या परिस्थितीत या नवजात अर्भकाला अशा विचित्र पध्दतीने छतावर टाकून देणारे निर्दयी लोक कोण असावेत ? या बालकाचा जन्म विवाह बाह्य संबंधातून झालेला असला तरी त्याचे शरीर असे तुटलेल्या अवस्थेत समोर दिसते आहे. मात्र हे घडले कसे ? अश्या प्रश्नांची मालिका सर्वांनाच अस्वस्थ करणारी आहे. मृत अर्भक सापडल्याने एकच गोंधळ उडाला आहे.
