Vaibhav Suryavanshi Viral Video: IPL 2026 मध्ये आपल्या आक्रमक फलंदाजीने सर्वांचे लक्ष वेधून घेणारा युवा क्रिकेटपटू वैभव सूर्यवंशी सध्या एका वेगळ्याच कारणामुळे चर्चेत आला आहे. सोशल मीडियावर वैभव आणि प्रसिद्ध समालोचक हर्षा भोगले यांच्यातील संवादाचा एक व्हिडीओ मोठ्या प्रमाणात व्हायरल होत आहे. या व्हिडीओमध्ये वैभव सूर्यवंशी हर्षा भोगले यांना उद्धटपणे उत्तर देताना दिसत आहे.
मात्र, या व्हिडीओमागील सत्य समोर आल्यानंतर अनेकांना धक्का बसला आहे. हा व्हिडीओ पूर्णपणे कृत्रिम बुद्धिमत्ता (AI) आणि डबिंगच्या मदतीने तयार करण्यात आला असल्याचे स्पष्ट झाले आहे. व्हिडीओतील संवाद खरे नसून मूळ मुलाखतीत असे कोणतेही प्रश्न किंवा उत्तरे नव्हती.
हा व्हिडीओ हर्षा भोगले यांच्यापर्यंत पोहोचल्यानंतर त्यांनी याबाबत तीव्र नाराजी व्यक्त केली. त्यांनी इन्स्टाग्रामवर एक सविस्तर पोस्ट करत हा व्हिडीओ खोटा असल्याचे स्पष्ट केले आणि वैभव सूर्यवंशीच्या प्रतिमेला धक्का पोहोचवण्याचा हा प्रयत्न असल्याचे म्हटले.
हर्षा भोगले यांनी आपल्या पोस्टमध्ये लिहिले की, "सोशल मीडियावर माझा आणि वैभव सूर्यवंशीचा एक बनावट डब केलेला व्हिडीओ फिरत आहे. त्यामध्ये वैभवला उद्धट आणि गर्विष्ठ दाखवण्याचा प्रयत्न करण्यात आला आहे. प्रत्यक्षात असा कोणताही प्रश्न विचारला गेला नव्हता आणि असे कोणतेही उत्तर त्याने दिलेले नाही."
ते पुढे म्हणाले, "ही अत्यंत दुर्दैवी आणि खोडसाळ कृती आहे. विशेषतः एका लहान वयाच्या मुलाबाबत दिशाभूल करणारा कंटेंट तयार करणे चुकीचे आहे. माझ्या आतापर्यंतच्या सर्व भेटींमध्ये वैभव नेहमी नम्र आणि आदराने वागलेला आहे."
या प्रकरणात कठोर कारवाई व्हावी यासाठी हर्षा भोगले यांनी BCCI आणि राजस्थान रॉयल्सलाही टॅग केले आहे.
व्हायरल झालेला हा व्हिडीओ 'BCCI नमन अवॉर्ड्स 2026' कार्यक्रमातील आहे. त्या कार्यक्रमात हर्षा भोगले यांनी वैभव सूर्यवंशीशी संवाद साधला होता. मात्र नंतर कुणीतरी या व्हिडीओचे एडिटिंग करून त्यात बनावट ऑडिओ जोडला आणि सोशल मीडियावर प्रसारित केला.
मूळ मुलाखतीत वैभवने अतिशय साधेपणाने आणि आत्मविश्वासाने आपल्या संघाच्या उद्दिष्टांविषयी बोलताना सांगितले होते, "यंदा आमचे लक्ष्य संघासाठी ट्रॉफी जिंकण्याचे आहे. आमची तयारी चांगली सुरू आहे आणि सर्व खेळाडू आत्मविश्वासात आहेत. त्यामुळे यंदा ट्रॉफी आमच्याच संघाकडे येईल, अशी आशा आहे."
गेल्या काही महिन्यांत AI च्या मदतीने तयार केलेले बनावट व्हिडीओ आणि ऑडिओ मोठ्या प्रमाणात व्हायरल होत आहेत. यामुळे अनेक सेलिब्रिटी, खेळाडू आणि मोठ्या व्यक्तींच्या प्रतिमेला धक्का पोहोचण्याची शक्यता वाढली आहे.
वैभव सूर्यवंशीच्या या प्रकरणामुळे पुन्हा एकदा सोशल मीडियावर दिसणाऱ्या प्रत्येक व्हिडीओवर विश्वास ठेवणे किती धोकादायक ठरू शकते, याची जाणीव झाली आहे. हर्षा भोगले यांच्या स्पष्टीकरणानंतर हा व्हिडीओ बनावट असल्याचे स्पष्ट झाले असले, तरी अशा प्रकारच्या खोट्या माहितीमुळे तरुण खेळाडूंवर मानसिक परिणाम होऊ शकतो, अशी चिंता व्यक्त केली जात आहे.
