पुढारी ऑनलाईन डेस्क
बॉलिवूडला डिस्को म्युझिक देणारे प्रसिध्द गायक आणि संगीत दिग्दर्शक बप्पी लहरी यांचे मुंबईतील एका रुग्णालयात निधन झालं. बॉलिवूडमध्ये कलाकारांनी आपल्या कलेच्या माध्यमातून प्रेक्षकांच्या मनावर राज्य केलं. यापैकी एक आहेत-बप्पी लहरी. बप्पी यांनी बॉलिवूडमध्ये दीर्घ प्रवास केला. सुरूवातीला त्यांचे संगीत नाकारले गेले. परंतु, पुढे-पुढे त्यांची गाणी ऐकली जाऊ लागली. तर काही गाण्यांनी धूमाकूळ घातला. बप्पी लहरी दोन गोष्टींमुळे ओळखले जातात-एक म्हणजे युनिक म्युझिक आणि दुसरे गोल्ड. बप्पी दा बॉलिवूडचे गोल्डन किंग म्हणून ओळखले जात होते. अंगावर ढिगभर सोने ते घालत होते. यामागची त्यांनी कहाणीदेखील सांगितली होती.
बप्पी लहरी यांचा जन्म २७ नोव्हेंबर, १९५२ रोजी पश्चिम बंगालमध्ये झाला होता. वयाच्या २१ व्या वर्षी बप्पी दा बॉलिवूडमध्ये गाण्यांना संगीत देऊ लागले होते. त्यांनी १९७३ मध्ये चित्रपट नन्हा शिकारीमधून आपल्या करिअरला सुरुवात केली होती. बप्पी यांना पहिल्यांदा ओळख मिळाली १९७६ मध्ये आलेला विशाल आनंद यांचा चित्रपट 'चलते-चलते'मधून. बॉक्स ऑफिस या चित्रपटाची खास जादू चालली नाही. परंतु, गाणी सिनेरसिकांच्या पसंतीस उतरली.
१९८२ मध्ये आलेला चित्रपट मिथुन चक्रवर्ती यांचा चित्रपट 'डिस्को डान्सर'मुळे बप्पी यांचे करिअर बहरले. या चित्रपटातील गाण्यांनी धुमाकूळ घातला होता. 'नमक हलाल, शराबी, हिम्मतवाला, साहेब, गुरू, घायल आणि रंगबाज' यासारख्या चित्रपटांना संगीत दिले.
२००० नंतरदेखील चित्रपटांमध्ये ते सक्रिय आहेत. 'टॅक्सी नंबर 9211,' 'द डर्टी पिक्चर,' 'हिम्मतवाला,' 'बद्रीनाथ की दुल्हनिया' आणि 'व्हाय चीट इंडिया' या चित्रपटातील गाण्यांना संगीत दिलं.
बप्पी यांनी लॉकेट घालणे आवडायचे. त्यांच्याकडे गणेश यांची प्रतिमा असलेले एक लॉकेट होते. हे लॉकेट ते नेहमी घालत होते. तसेच ते काही आकर्षक चेन आणि ब्रेस्लेट घालायचे.
