सातारा : ऊस वाहतूक वाहनांना जीपीएस प्रणाली | पुढारी

सातारा : ऊस वाहतूक वाहनांना जीपीएस प्रणाली

रेठरे बुद्रूक, पुढारी वृत्तसेवा: यशवंतराव मोहिते कृष्णा सहकारी साखर कारखाना सभासद हिताला प्राधान्य देणारा व नावीन्यपूर्ण उपक्रम राबविणारा कारखाना म्हणून महाराष्ट्रात ओळखला जात आहे. चेअरमन डॉ. सुरेश भोसले यांच्या मार्गदर्शनाखाली संचालक मंडळ सातत्याने शेतकरी सभासदांच्या हितासाठी नवनवीन उपक्रम राबवित असते. आता जीपीएस प्रणाली म्हणजेच ग्लोबल पोसिशन सिस्टीम प्रणालीचा अवलंब ऊस वाहतूक करणार्‍या वाहनांसाठी करत कृष्णा कारखान्याने आधुनिकतेकडे आणखी एक पाऊल टाकले आहे.

शेतकर्‍यांचे उत्पादन वाढीसाठी जयवंत आदर्श कृषी योजना, शेतकरी संवाद मेळावे, अल्प दरात द्रवरूप जिवाणू खते, सेंद्रिय खते, माती परिक्षण, सभासदांना मोफत घरपोच साखर यासारखे उपक्रम कारखाना सातत्याने राबवित आहे. कारखान्याचे चेअरमन डॉ. सुरेश भोसले यांच्या मार्गदर्शनाखाली कारखान्यात अत्याधुनिक तंत्रज्ञानाचा वापर करण्यात आला आहे. ज्यामध्ये प्रामुख्याने ई -टेंडर प्रणाली राबविण्यात आली.

त्यामुळे टेंडर प्रक्रियेत पारदर्शकता आली. आज देशातील नामवंत साहित्य पुरवठादारही यात सहभागी होत आहेत. शेतकरी सभासदांना आधुनिक स्वरूपाचे स्मार्ट कार्ड देण्यात आले आहे. सभासदांना त्वरित साखर, टनेज व बिलांची माहिती स्मार्ट कार्डमुळे मिळत आहे. ऊस नोंदीही कृष्णा कारखान्यात मोबाईल अ‍ॅपद्वारे घेतल्या जात आहेत, ज्यामुळे शेतकरी सभासदांच्या ऊस नोंदी अचूकपणे केल्या जातात. ज्यामुळे तोडणी प्रक्रिया पारदर्शकरीत्या राबविण्यात येते.

शेतकर्‍यांचा ऊस तुटल्यावर लवकरात लवकर गाळप व्हावे या दृष्टिकोनातून कृष्णा कारखान्याने ऊस वाहतूकदारांना यापूर्वीच स्मार्ट कार्ड दिले आहेत. त्यामुळे ऊस गाडी नंबर लावण्यात होणार्‍या गैरप्रकारांना आळा बसला आहे. त्याचबरोबर आता टोमॅटिक नंबर टेकिंग प्रणालीचा अवलंब कृष्णा कारखाना करत असून यामुळे वेळेची बचत होणार आहे. कृष्णा कारखान्यात जीपीएस प्रणालीचा वापर ऊस वाहतूक करणार्‍या वाहनांना केला जात आहे. ही जी पी एस प्रणाली अत्याधुनिक पद्धतीची असून कारखान्याच्या संगणक विभागाने तयार केली आहे.

कृष्णा कारखान्यात नवनवीन तंत्रज्ञानाचा अवलंब आपण करत आलो आहोत. ऊस नोंदणीसाठी मोबाईल प, ई -करार, ई- टेंडरिंग यासारखे नावीन्यपूर्ण प्रयोग पहिल्यांदा कृष्णा कारखान्यात करण्यात आले. त्याचपद्धतीने ऊस वाहतूक करणार्‍या वाहनांना जी.पी.एस. प्रणालीचा वापरही करण्यात येत आहे. ज्यामुळे तोडणी यंत्रणा गतिमान झाली असून ज्याचा फायदा शेतकर्‍यांना व कारखान्यास निश्चितपणे होणार आहे.

महत्वाचे 

ऊस वाहतूक वाहनांचे कारखाना ते प्रत्यक्ष ऊस तोडणी प्लॉटपासूनचे समजणार अचूक अंतर

अचूक लोकेशन, इंधन स्थितीसह ऊस वाहतुकीचे वाहन चालू की बंद हे समजण्यास होणार मदत

कारखाना वाहन तळावर उसाने भरलेल्या वाहनांचा लागलेला अ‍ॅटो नंबर वाहन मालकास समजणार

हेही वाचलंत का? 

Back to top button