पुणे: सहकारातील बँकिंग व्यवहार अधिक वेगवान व सुलभ करण्यासाठी आणि इतर सर्व संस्थांना आधुनिक डिजीटल पेमेंट प्रणालीशी जोडण्यासाठी महाराष्ट्र राज्य सहकारी बँकेने “एअरपे” या टेक्नॉलॉजी कंपनीबरोबर सहयोग करार करत स्वतंत्र “यूपीआय स्वीकारकर्ता बँक” म्हणून सेवा प्रकल्प कार्यान्वित केला आहे. अशाप्रकारे यूपीआय व्यवहार स्वीकारणारी महाराष्ट्र राज्य सहकारी बँक ही देशातील पहिली शिखर बँक ठरल्याची माहिती बँकेचे प्रशासक विद्याधर अनास्कर यांनी दिली. त्यामुळे यूपीआय सेवा घेण्यासाठी व्यापारी बँकांवरील अवलंबित्व कमी होणार आहे.
राज्यातील ग््राामीण अर्थव्यवस्थेचा कणा असलेल्या सहकारातील त्रिस्तरीय रचनेत शिखर बँक म्हणून कार्यरत असलेल्या राज्य सहकारी बँकेसह, राज्यातील 31 जिल्हा मध्यवर्ती सहकारी बँका व सुमारे 21 हजारांहून जास्त विकास सोसायट्यांचा समावेश होतो. “सहकाराअंतर्गत सहकार” या सहकारातील सर्वोच्च तत्वानुसार महाराष्ट्र राज्य सहकारी बँक यामध्ये अत्यंत महत्त्वाची भूमिका पार पाडणार आहे.
सध्या अनेक जिल्हा मध्यवर्ती सहकारी बँकांना आणि नागरी सहकारी बँकांना यूपीआय सेवा घेण्यासाठी व्यापारी बँकांवर अवलंबून राहावे लागते. यापुढे मात्र राज्य सहकारी बँकेने “यूपीआय स्वीकारणारी बँक” हा दर्जा प्राप्त केल्याने सहकार क्षेत्रातील आर्थिक व्यवहार यापुढे सहकार व्यवस्थेच्या अंतर्गतच सुरक्षित राहतील.
या प्रकल्पामुळे सहकारी संस्थांचे आर्थिक व्यवहार सुलभ व जलद होण्याबरोबरच त्यामध्ये अधिक पारदर्शकता येईल व सहकारावरील विश्वास वाढीस लागेल. डिजीटल क्रांतीच्या या युगात ग््राामीण भागातील सभासद आणि शेतकऱ्यांना आधुनिक बँकिंग सेवा प्रदान करण्याच्या दिशेने पडलेले हे योग्य पाऊल म्हणावे लागेल. महाराष्ट्र राज्य सहकारी बँकेने सुरू केलेल्या या प्रकल्पामुळे राज्याचे सहकार क्षेत्र अधिक डिजीटल सक्षम होईल व सदर प्रणाली अधिक स्वावलंबी होईल, असा विश्वासही अनास्कर यांनी व्यक्त केला आहे.
बँकांसह दूध संघ, कारखाने, इतरही सहकारी संस्थांना होणार लाभ
महाराष्ट्र राज्य सहकारी बँकेने या उपक्रमाअंतर्गत स्वत:चे यूपीआय हॅण्डल म्हणजे ओळख राज्यातील सर्व जिल्हा सहकारी बँका, नागरी सहकारी बँका व विविध कार्यकारी संस्थाबरोबरच दूध संघ, साखर कारखाने व सहकारातील इतर सर्व संस्थांना देण्याचे ठरविले आहे. त्यामुळे या संस्थांना पेमेंट कलेक्शनसाठी आता शिखर बँकेचे अधिकृत वेबसाइट वापरता येणार आहे. अशाप्रकारे स्वत:चे अधिकृत यूपीआय हॅण्डल असणारी महाराष्ट्र राज्य सहकारी बँक ही देशातील पहिली व एकमेव राज्य बँक ठरली आहे.
