जळगाव : बँकेच्या कर्मचाऱ्यांनीच चोरले बँकेतील कोट्यवधींचे दागिने | पुढारी

जळगाव : बँकेच्या कर्मचाऱ्यांनीच चोरले बँकेतील कोट्यवधींचे दागिने

जळगाव : पुढारी वृत्तसेवा

भडगाव तालुक्यातील आमडदे येथील महाराष्ट्र ग्रामीण बॕकेत शेतकरी व ग्राहक यांनी तारण ठेवलेल्या सुमारे तीन कोटी रुपये किंमतीच्या दागिन्यांची चोरी झाली. या चोरीचा उलगडा पोलिस निरीक्षक अशोक उत्तेकर व त्यांच्या पोलिसांनी अवघ्या तीन तासांत लावला. पोलिसांनी बॕक कर्मचारी आणि त्यांचे दोन साथीदार यांना ताब्यात घेत या चोरीचा पर्दाफाश केला. या चोरीमुळे तालुक्यात मोठी खळबळ उडाली आहे. घटनास्थळी जिल्हा पोलिस अधिक्षक डाॕ. प्रविण मुंडे यांनी भेट देत पोलिस अधिकाऱ्यांना पुढील तपासाबाबत सुचना दिल्या.

भडगाव तालुक्यातील आमडदे येथे महाराष्ट्र ग्रामीण बॕक शाखा असून येथे मॕनेजरसह तीन कर्मचारी कार्यरत आहे. दि. २२ नोव्हेंबर रोजी रात्री १ ते २-३०च्या दरम्यान बॕकेत चोरी झाल्याची माहिती गावात पसरली. चोरी झाल्याची माहिती कर्मचाऱ्यांनीच गावातील नागरिकांना दिली. या घटनेची माहिती भडगाव पोलिसांना देण्यात आली. पोलिस घटनास्थळी पोहचताच बॕकेत घटनास्थळी चोरी करताना चोरांकडून बॕकेचे कुलुप तोडणे, तिजोरी फोडणे, लाॕकर तोडणे असा कोणताही प्रकार दिसून येत नव्हता. तर बॕकेत असलेल्या रोख रकमेलाही हात लावलेला दिसून येत नव्हता. त्यामुळे या चोरीत बॕकेतीलच कर्मचाऱ्यांचा सहभाग असावा असा संशय प्रथमदर्शनी पोलिसांना येत होता.

बॕकेच्या मागे रहाणारा शिपाई राहुल पाटील यास विचारपूस करत माहिती घेतली असता व पोलिसी खाक्या पोलिसांनी दाखविला असता बॕक शिपाई हा पोपटासारखा बोलू लागला. या चोरी प्रकरणी बॕक शिपाई राहुल पाटील व त्याच्या अन्य दोन साथीदार यांना ताब्यात घेण्यात आले आहे. यात आरोपींच्या शिक्षेत वाढ होण्याची शक्यता पोलिसांकडून वर्तविली जात आहे. यावेळी जळगाव येथील श्वान पथक घटनास्थळी पाचारण करण्यात आले होते.

आरोपींनीच काढून दिले दागिने…

भडगाव पोलिसांनी ताब्यात घेतलेला आरोपी कर्मचारी व अन्य दोन साथीदार यांना बोलत करत चोरीच्या घटनेतील मुद्देमाल कुठे लपविला आहे याबाबत माहितीची खात्री करत तिघा आरोपींपैकी एका आरोपीच्या आमडदे शेत शिवारातील “जोगडा” कडील शेतात व आचळगाव रस्त्याकडील शेतात खड्डा करुन लपविलेले दागिणे आरोपीनी काढून दिले. घटनास्थळी पोलिस टीम पोलिस अधिक्षक डाॕ. प्रविण मुंडे, डीवायएसपी सचिन गोरे, उपविभागिय पोलीस अधिकारी कैलास गावडे, यांनी भेट देऊन मार्गदर्शन केले. पुढील तपास पोलीस निरीक्षक अशोक उत्तेकर, एलसीबीचे पोलीस उपनिरीक्षक, त्यांचे पथक पोलिस लक्ष्मण पाटील, भडगाव सहा. फौजदार कैलास गिते, पोलीस काॕ. विलास पाटील, स्वप्निल चव्हाण, कीरण पाटील, ज्ञानेश्वर महाजन, चालक राजू पाटील करीत आहेत.

हेही वाचल का?

Back to top button