वाशिम; अजय ढवळे: मानसिक त्रास देवून युवकास आत्महत्येस प्रवृत्त केल्याप्रकरणी नगराध्यक्ष, मुख्याधिकारी व अभियंता यांच्यावर २३ सप्टेंबर रोजी भांदवी कलम ३४ व ३०६ अंतर्गत वाशीम ग्रामीण पोलीस स्टेशनमध्ये गुन्हे दाखल झाला आहे. हा गुन्हा फाशी घेण्याआधी त्याने लिहिलेल्या चिठ्ठीत नमुद केलेल्या मजकुराच्या आधारे वाशीम ग्रामीण पोलीसांनी केला आहे.
शिवा संघटनेचे पदाधिकारी असलेले गोपाल रविशकंकर महाजन (वय ३२, रा. शिवाजीनगर, सिव्हील लाईन वाशिम) यांनी २२ सप्टेंबरच्या रात्री ९ च्या सुमारास मालेगाव रस्त्यावरील झाकलवाडी शेतशिवारात झाडाला गळफास लावून आत्महत्या केली होती. याबाबत त्यांचे भाऊ सचिन महाजन यांनी ग्रामीण पोलीस स्टेशनला फिर्याद दाखल केली होती.
या प्रकरणाचा तपास ग्रामीण पो. स्टे. चे सहाय्यक पोलीस निरिक्षक रमेश गलांडे हे करीत आहेत. दरम्यान या घटनेची माहिती मिळताच, शिवा संघटनेचे अध्यक्ष मनोहर धोंडे यांनी त्वरीत वाशीमचे एस. पी. डीवायएसपी यांना फोन लावून सदर प्रकरणी सबंधितांवर त्वरीत कारवाई करण्याची मागणी केली. तसेच कारवाई न झाल्यास शिवा संघटनेच्या वतीने तीव्र आंदोलन उभारण्याचा इशारा दिला होता.
फिर्यादीनुसार, सचिन महाजन हा शेतावर असताना त्याला पोलीसांचा फोन केला होता. याच दरम्यान त्यांनी आम्ही वाशीम ग्रामीण येथून बोलत असून तुमचा लहान भाऊ गोपाल रविशंकर महाजन याने मालेगाव रोडवरील मथुरा हाँटेलचे समोरील गावंडे ले आँऊटमधील निंबाचे झाडाला गळफास घेवून आत्महत्या केल्याचे सांगितले. तसेच तुम्ही ताबडतोब येथे या असेदेखील सांगितले.
यानंतर सचिन महाजनसोबत भागवत चौधरी, जगदिश गोरे असे मालेगाव रोडवरील मथुरा हाँटेल समोरील गांवडे लेआऊट येथे गेलो असता माझा लहान भाऊ गोपाल महाजन हा निबांचे झाडाला दोरीने गळफास घेवून लटकलेला अवस्थेत दिसला. त्या ठिकाणी पोलीससुध्दा हजर होते.
पोलीस कार्यवाही करीत असताना भाऊ गोपालच्या सुझुकी एक्सेस १२५ स्कुटीची डिकी उघडून पोलिसांनी पाहणी केली असता त्यामध्ये एक फाईल मिळून आली. सदर फाईलची पोलीसांनी चौकशी केली असता त्यामध्ये गोपालने मरणापुर्वी स्वत:चे अक्षरात लिहून ठेवलेली सहा पानाची चिठ्ठी मिळून आली आहे.
सदरच्या सुसाईट नोटमध्ये गोपालने जगतज्योती महात्मा बसवेश्वर वचन स्तंभ व चौक सौंदर्यीकरणा बाबतच्या कामासाठी नगरपरिषद जागा उपलब्ध करुन देत नसल्याने व नगरपरिषदेचे मुख्याधिकारी दिपक मोरे, अभियंता विजय घोगरे व अध्यक्ष अशोक हेडा यांनी दिलेल्या मानसिक त्रासाबाबत उल्लेख केलेला होता. तर या घटनेला कंटाळून स्वत: आत्महत्या करीत असल्याचे नमुद केले आहे. याशिवाय या सुसाईट नोटमधील हस्ताक्षर गोपाल यांचे असल्याचे भावाने सांगितले आहे.
यानंतर या तिघांनी दिलेल्या मानसिक त्रासाला कंटाळून गोपालने आत्महत्या केल्याची फिर्याद गोपाळच्या भाऊ सचिन महाजन यांनी वाशीम ग्रामीण पोलीस स्टेशनला दिली. या फिर्यादीनुसार पोलीसांनी न. प. अध्यक्ष, मुख्याधिकारी. अभियंता यांच्यावर कलम ३०६ व ३४ अन्वये गुन्हे दाखल केला आहे.
गोपाल आप्पा महाजन हे शिवा संघटनेचे धडाडीचे, निडर आणि मनमिळाऊ व्यक्तीमत्व आणि सामाजिक कार्यकर्ते होते. अत्यंत मनमिळाऊ स्वभाव व विशाल मित्रपरिवार असल्यामुळे त्यांच्या निधनाची वार्ता वार्यासारखी शहरात पसरली होती. गोपाल महाजन यांनी कोरोनाकाळात जिवाची पर्वा न करता अनेकांना मदत केली होती. या दरम्यान त्यांनाही कोरोनाचा संसर्ग झाला होता. त्यातून ते बरे झाले होते.
शिवा संघटनेतील एक महत्वाच्या पदाची जबाबदारी घेवून हिंगोली नाका येथे महात्मा बसवेश्वर चौकाच्या सौदर्यीकरणासाठी त्यांनी संघर्षाचा पवित्रा घेवून हिंगोली नाका येथे महात्मा बसवेश्वरांचे वचनस्तंभ व सौदर्यीकरण व्हावे यासाठी गेल्या ४ ते ५ वर्षापासून लढा उभारला होता.
यादरम्यान त्यांनी अनेकवेळा नगर परिषदेला निवेदने देवून आंदोलन व आत्मदहनाचा इशारा सुध्दा दिला होता. गोपाल यांच्या प्रयत्नाने व पुढाकाराने सौदर्यीकरणाचा मार्ग मोकळा झाला होता. शिवाय त्यांच्याच प्रयत्नाने या सौदर्यीकरण कामासाठी खासदार भावनाताईंनी ३ लाखांचा निधी उपलब्ध करुन दिला होता.
त्यांच्या निवेदनाची दखल घेवून भूमि अभिलेख कार्यालयाच्या वतीने जागेचे मोजमाप करण्यात आले होते. परंतु, सदरील जागा ही दुसर्याच्या ताब्यात असल्यामुळे संबंधितांनी याठिकाणी मोजमाप करण्यास आडकाठी आणली होती.
अत्यंत कमी वयात त्यांनी आत्महत्येसारखा कठोर निर्णय घेतल्याने अनेकांना जबर धक्का बसला आहे. तर त्यांच्या आत्महत्येप्रकरणी नगराध्यक्ष, मुख्याधिकारी व अभियंत्यांवर गुन्हे दाखल झाल्याने जिल्हयात खळबळ उडाली आहे.
हेही वाचलंत का?
