पुढारी ऑनलाईन डेस्क : ऑस्कर सोहळ्यात कॉमेडियन ख्रिस रॉकला थप्पड मारल्यापासून विल स्मिथ (Will Smith apology) चांगलाच चर्चेत आहे. या घटनेला चार महिने उलटले आहेत. आता स्मिथने पुन्हा एकदा त्याच्या सोशल मीडिया अकाउंटवर एक व्हिडिओ शेअर करून ख्रिसची माफी मागितली आहे. या व्हिडिओमध्ये त्याने असेही सांगितले की, 'मी ख्रिसशी बोलण्याचाही प्रयत्न केला, पण तो अजून तयार नाही'. ख्रिस अजून बोलायला तयार नाही. (Will Smith apology)
स्मिथने शेअर केलेल्या व्हिडिओच्या सुरुवातीला काही ओळी लिहिल्या आहेत. त्यात लिहिले आहे की, गेल्या अनेक महिन्यांपासून मी खूप विचार करत आहे आणि त्यावर कामही करत आहे. तुम्ही लोकांनी मला काही प्रश्न विचारले आहेत, आज मला त्यांची उत्तरे द्यायची आहेत. तो पुढे म्हणाला- ऑस्कर इव्हेंटमध्ये मी माझे मानसिक संतुलन गमावले. मला माहित नाही मी काय विचार करत होतो, मी पण गोंधळलो होतो.
मी ख्रिसचा नंबर मिळवला आणि त्याच्याशी बोलण्यासाठी त्याला मेसेजही केला. तरी तो बोलायला तयार नाही. तो म्हणाला, मी बोलण्याच्या स्थितीत असेन तेव्हा तुमच्याशी बोलेन. ख्रिस मी तुझी माफी मागतो. मला माहित आहे की, माझी वागणूक योग्य नव्हती. जेव्हा तुम्हाला बोलायचे असेल तेव्हा मी इथे असेन. व्हिडिओमध्ये पुढे विलने ख्रिस रॉकच्या आईचीही माफी मागितली.
विल स्मिथने ऑस्कर ॲवॉर्ड्स २०२२ दरम्यान कॉमेडियन ख्रिस रॉकला स्टेजवर थप्पड मारली होती. ख्रिस रॉक विलच्या पत्नीच्या टक्कल पडण्याबद्दल विनोद करतो. पत्नीच्या शेजारी बसलेल्या विलला याचे खूप वाईट वाटले आणि त्याने स्टेजवर जाऊन ख्रिसला एक मोठी थप्पड दिली. मात्र, काही दिवसांनी विलने या घटनेबद्दल माफीही मागितली.
कॉमेडियनला थप्पड मारल्यानंतर विलने २९ मार्च रोजी अॅकॅडमी ऑफ मोशन पिक्चरचा राजीनामा दिला होता. राजीनाम्यानंतर दिलेल्या निवेदनात स्मिथ म्हणाला की, मी केलेली कारवाई अत्यंत लज्जास्पद आणि धक्कादायक होती. ज्यांना माझ्यामुळे त्रास झाला आहे, त्या सर्वांची मी माफी मागतो. अकादमीच्या विश्वासाचा मी विश्वासघात केला आहे. बोर्ड जो काही निर्णय घेईल तो मला मान्य असेल.
विल स्मिथने यापूर्वी माफी मागितली आहे. विलने पोस्ट शेअर करत लिहिले की, 'सर्व प्रकारची हिंसा विषारी आणि विनाशकारी असते. काल रात्रीच्या अकादमी पुरस्कार सोहळ्यातील माझे वर्तन माफी मागण्यास पात्र नाही. माझी खिल्ली उडवणे हा कामाचा एक भाग आहे, पण जाडाच्या वैद्यकीय स्थितीबद्दलचा विनोद मला सहन झाला नाही आणि मी भावनिक प्रतिक्रिया दिली. मला तुझी जाहीर माफी मागायची आहे, ख्रिस. मी माझी मर्यादा ओलांडली आणि माझी चूक झाली.'
विलने पोस्टमध्ये पुढे लिहिले की, 'मला लाज वाटते आणि माझ्या या वागण्याने माझी अशी प्रतिमा तयार झाली आहे, जी मी पुन्हा मिळवू शकत नाही. प्रेम आणि दयाळूपणाच्या जगात हिंसेला स्थान नाही. मी अकादमीची, शोचे निर्माते, सर्व उपस्थितांची आणि जगभरात पाहणाऱ्या प्रत्येकाची माफी मागू इच्छितो. मला विल्यम्स कुटुंबाची आणि माझ्या राजा रिचर्ड कुटुंबाची माफी मागायची आहे. माझ्या वागण्याने आपल्या सर्वांचा हा सुंदर प्रवास बिघडला याबद्दल मला खूप वाईट वाटते.'
