EPFO PF Withdrawal: कर्मचारी भविष्य निर्वाह निधी संघटनेने (EPFO) आपल्या सेवा अधिक वेगवान आणि सुलभ करण्यासाठी मोठे बदल केले आहेत. आता पीएफचे पैसे काढण्यासाठी ऑफिसच्या फेऱ्या मारण्याची किंवा अनेक दिवस वाट पाहण्याची गरज नाही. नव्या बदलामुळे, ऑनलाइन दावा (Claim) केल्यानंतर अवघ्या 24 ते 48 तासांत रक्कम थेट बँक खात्यात जमा होणार आहे.
EPFO चे वरिष्ठ अधिकारी रमेश कृष्णमूर्ती यांनी सांगितले की, संस्थेने दावा निकाली काढण्याची प्रक्रिया वेगवान केली आहे. सध्या सुमारे 90 टक्के पीएफ दावे ऑटो-सेटल होत आहेत. त्यामुळे आजारपण, लग्न, घर बांधकाम किंवा इतर गरजांसाठी पैसे काढण्याची प्रक्रिया आता खूपच सोपी झाली आहे. अर्ज केल्यानंतर अनेक प्रकरणांमध्ये त्याच दिवशी किंवा जास्तीत जास्त 48 तासांत दावा मंजूर केला जात आहे.
EPFO आणखी एक महत्त्वाचा बदल करण्याच्या तयारीत आहे. लवकरच BHIM अॅप आणि UPI च्या माध्यमातून पीएफची रक्कम थेट संबंधित बँक खात्यात जमा केली जाणार आहे. यामुळे क्लेमची प्रक्रिया अधिक जलद, सुरक्षित आणि पारदर्शक होईल. पुढील काही आठवड्यांत ही सुविधा सुरू होण्याची शक्यता अधिकाऱ्यांनी व्यक्त केली आहे.
सामाजिक सुरक्षा योजनांचा लाभ आता केवळ नियमित नोकरी करणाऱ्यांपुरता मर्यादित राहणार नाही. सरकार ई-कॉमर्स कंपन्यांमध्ये काम करणारे डिलिव्हरी पार्टनर, गिग वर्कर्स आणि असंघटित क्षेत्रातील मजूर यांच्यासाठीही स्वतंत्र सामाजिक सुरक्षा योजना आणण्याच्या तयारीत आहे. नवीन विधेयकाद्वारे या कामगारांनाही पीएफसारख्या सुविधांचा लाभ देण्याचा सरकारचा प्रयत्न आहे.
EPFO च्या व्याजदरात वाढ होणार का, याबाबत विचारले असता अधिकाऱ्यांनी सध्या कोणतीही घोषणा करण्यास नकार दिला. सध्या EPF ठेवींवर 8.25 टक्के व्याज दिले जात आहे. अलीकडेच EPFO ने 34 कोटींहून अधिक खातेदारांच्या खात्यात एकूण 1.44 लाख कोटी रुपयांचे व्याज जमा केले आहे.
EPFO चे उद्दिष्ट म्हणजे कागदपत्रांचा त्रास कमी करून कर्मचारी आणि कंपन्यांसाठी संपूर्ण प्रक्रिया डिजिटल, जलद आणि पारदर्शक बनवणे. त्यामुळे भविष्यात पीएफशी संबंधित बहुतांश सेवा ऑनलाइन आणि कमी वेळेत पूर्ण होणार आहेत.
नव्या व्यवस्थेमुळे पीएफ काढण्यासाठी लागणारा वेळ मोठ्या प्रमाणात कमी होणार असून, गरजेच्या वेळी कर्मचाऱ्यांना त्यांच्या बचतीची रक्कम लवकर उपलब्ध होणार आहे. त्यामुळे EPFO च्या डिजिटल सेवांवरील विश्वास आणखी वाढण्याची अपेक्षा व्यक्त केली जात आहे.
