नवी दिल्ली, पुढारी वृत्तसेवा : राजधानी दिल्लीत सत्ताधारी आम आदमी पार्टी आणि विरोधी पक्ष भाजपमध्ये पुन्हा एकदा आरोप प्रत्यारोपाच्या फैरी झडत आहेत. सिव्हिल लाईन येथील 'मुख्यमंत्री निवास'च्या नूतनीकरणासाठी अरविंद केजरीवाल यांनी जवळपास ४५ कोटी खर्च केल्याचा आरोप भाजपने केला आहे. भाजप नेते संबित पात्रा यांनी त्यामुळे नैतिकतेच्या आधारे केजरीवालांनी राजीनामा द्यावा, अशी मागणी बुधवारी केली. दिल्ली कोरोना महारोगराई सारख्या संकटाचा सामना करीत होती तेव्हा केजरीवालांच्या शासकीय निवास्थानाच्या नूतनीकरणासाठी निधी मंजूर करण्यात आला होता, असा आरोप देखील पात्रा यांनी केला.
'कोरोना महारोगराईचा प्रकोप वाढत असतांना, लोकांचा मृत्यू होत असतांना अरविंद केजरीवाल त्यांच्या बंगल्याच्या डागडुजीत व्यस्त होते. यादरम्यान केजरीवाल यांनी त्यांच्या 'शीशमहाल'साठी कोट्यवधींचा खर्च केला', असा आरोप पात्रा यांनी केला. 'महाराजा केजरीवाल' अशा शब्दात भाजपने टिका करीत 'अरविंद केजरीवाल महाराज' प्रसारमाध्यमांना प्रलोभने देत असल्याचा धक्कादायक दावा केला.
दरम्यान, मुख्यमंत्र्यांचे सरकारी निवासस्थान ७० ते ८० वर्ष जुने आहे. १९४२ मध्ये ही वास्तु उभारण्यात आली होती. राज्य सरकारच्या पीडब्ल्यूडी विभागाने बंगल्याच्या जीर्णोद्वाराची शिफारस केली होती, याच शिफारसच्या आधारे हे काम करण्यात आल्याची स्पष्टोक्ती आप खासदार राघव चढ्ढा यांनी दिली.
हेही वाचा :
