सासवड(पुणे); पुढारी वृत्तसेवा : सासवड शहराला पाणीपुरवठा करणारे गराडे धरण 80 टक्के भरले आहे. धरणाची पाणी साठवणूक क्षमता 65.37 दशलक्ष घनफूट आहे. गराडे धरण परिसरात पावसाचा जोर कायम राहिल्यास धरण दोन दिवसांत 100 टक्के भरेल, असे पाटबंधारे शाखा अभियंता गणेश गायकवाड यांनी सांगितले. गराडे धरणातून गराडे, कोडीत, चांबळी व हिवरे आदी गावांना शेतीसाठी पाणी सोडले जाते. तसेच, सासवड शहर, कोडीत खुर्द, कोडीत बु, चांबळी व हिवरे या गावांना पाणीपुरवठा केला जातो.
चतुर्मुख महादेव मंदिर परिसर, दरेवाडी, थापे-वारवडी, रावडेवाडी, हनुमानवाडी, मठवाडी परिसरात संततधार पावसामुळे पाणीच पाणी झाले आहे. त्यामुळे कर्हा नदीवरील गराडे धरण 80 टक्के भरले आहे. कर्हेच्या पाण्यावर अवलंबून असलेल्या शेतकरीवर्गात आनंदाचे वातावरण निर्माण आहे. सध्या सासवड शहराला दिवसाआड पाणीपुरवठा सुरू आहे, असे सासवड नगरपालिकेचे पाणीपुरवठा अभियंता संकेत नंदवंशी यांनी सांगितले. त्यात धरण पूर्ण क्षमतेने भरल्यास सुधारणा होण्याची शक्यता आहे.
गराडे परिसरातील पाझर तलाव, बंधारे, विहिरी आटल्याने पाणीटंचाई भासू लागली होती. जनावरांचेही पाण्याच्या कमतरतेमुळे हाल होत होते. परंतु, संततधार पावसामुळे पुरंदरच्या पश्चिम भागातील ओढे, नाले, बंधारे, विहिरींच्या पाणीपातळीत वाढ झाली आहे. त्यामुळे शेतकर्यांनी समाधान व्यक्त केले. दरम्यान, तालुक्यात गुरुवारी (दि. 3) भिवडी (1 मिमी) वगळता सासवड, जेजुरी, राजेवाडी, वाल्हा, परिंचे, कुंभारवळण येथे पावसाची नोंद झाली नाही, असे पुरंदर तहसीलमधील लिपीक विनोद साबळे यांनी सांगितले. सासवडला पाणीपुरवठा करणारे वीर धरण : 83 टक्के, गराडे : 80 टक्के, घोरवडी : 15 टक्के भरल्याची माहिती नंदवंशी यांनी दिली.
हेही वाचा
