Usman Tariq India Pakistan: 15 फेब्रुवारीला होणाऱ्या भारत-पाकिस्तान सामन्याआधी उस्मान तारीक या खेळाडूची जोरदार चर्चा सुरू आहे . आयसीसी T20 World Cup 2026 चा थरार वाढत असतानाच पाकिस्तानचा हा ‘मिस्ट्री ऑफ-स्पिनर’ भारतीय संघासाठी मोठा धोका ठरू शकतो, असं अनेक क्रिकेट तज्ज्ञ मानतात.
उस्मान तारीक आंतरराष्ट्रीय क्रिकेटमध्ये तुलनेने नवा असला, तरी त्याच्या गोलंदाजीच्या शैलीमुळे तो अल्पावधीतच चर्चेत आला आहे. ऑफ-स्पिनर असलेला तारीक चेंडू टाकण्याआधी क्षणभर थांबतो, जणू एखाद्या पुतळ्यासारखा स्थिर. हाच 'पॉज' फलंदाजांचा समतोल बिघडवतो आणि चेंडू नेमका कधी सुटणार, याचा अंदाज बांधणं कठीण होतं.
त्याची ही विचित्र अॅक्शन इतकी गाजली की पाकिस्तान सुपर लीगदरम्यान त्याची दोनदा चौकशीही झाली. मात्र लाहोरमधील नॅशनल क्रिकेट अकॅडमीमध्ये झालेल्या बायोमेकॅनिकल चाचण्यांनंतर तो आयसीसीच्या 15 अंश एल्बो फ्लेक्स नियमांत बसतो, असं स्पष्ट करण्यात आलं. स्वतः तारीकनेही सांगितलं की, त्याच्या हाताची रचना नैसर्गिक आहे, मुद्दाम काही वेगळं करत नाही.
मात्र विरोधी संघांना त्रास देणारी गोष्ट म्हणजे त्याचा तो 'पॉज'. पाकिस्तानचा माजी कर्णधार सरफराज अहमदच्या मते, हा छोटासा ब्रेक फलंदाजांचा रिदम पूर्णपणे बिघडवतो. टी20 वर्ल्ड कपच्या सुरुवातीच्या सामन्यांतच याचा परिणाम दिसून आला असून कॅमेरॉन ग्रीन आणि डेवॉल्ड ब्रेव्हिससारखे फलंदाजही गोंधळलेले दिसले.
कमी संधी मिळूनही तारीकने प्रभावी कामगिरी केली आहे. अमेरिकेविरुद्धच्या सामन्यात त्याने तीन विकेट्स घेतल्या, तर रावळपिंडीमध्ये त्याच्या नावावर टी20 आंतरराष्ट्रीय हॅट्ट्रिकही आहे. त्यामुळे पाकिस्तान त्याला जपून वापरत असला, तरी त्याचा 'सरप्राइझ फॅक्टर' कायम ठेवण्याचा प्रयत्न दिसत आहे.
इंग्लंडचा माजी कर्णधार केविन पीटरसनने तारीकची “स्टॉप-अँड-पॉज” अॅक्शन बेकायदेशीर असल्याचं म्हटलं आहे. दुसरीकडे भारताचा फिरकीपटू रविचंद्रन अश्विन याने वेगळाच सल्ला दिला, भारतीय फलंदाज क्रीजच्या बाहेरुन तारीकवर मानसिक दबाव टाकू शकतात, असं तो म्हणाला.
15 फेब्रुवारीला भारत-पाकिस्तान सामना रंगणार असताना, तारीकच्या अॅक्शनमुळे सध्या चर्चा होत आहे. भारताचे इशान किशन आणि संजू सॅमसन सध्या जोरदार फटकेबाजी करत असले, तरी स्पिनला मदत करणाऱ्या खेळपट्टीवर तारीकसारखा अनोखा गोलंदाज निर्णायक ठरू शकतो.
एकूणच, हा सामना केवळ भारत-पाकिस्तान प्रतिस्पर्धेपुरता मर्यादित न राहता, उस्मान तारीक विरुद्ध भारतीय फलंदाज अशी आणखी एक रोमांचक लढत पाहायला मिळण्याची शक्यता आहे. क्रिकेट चाहत्यांसाठी 15 फेब्रुवारीचा दिवस त्यामुळे आणखीच थरारक असणार आहे.
