IND vs NZ: केएल राहुलने रचला इतिहास; वेलिंग्टनमध्ये ऐतिहासिक शतक, दिग्गजांच्या यादीत मिळवले मानाचे स्थान

KL Rahul Test Century: वेलिंग्टन कसोटीत न्यूझीलंडविरुद्ध केएल राहुलने २०७ चेंडूंचा सामना करत शानदार शतक झळकावले. हे त्याच्या कसोटी कारकिर्दीतील १३ वे शतक आहे.
KL Rahul Test Century
KL Rahul Test CenturyPudhari
Published on: 
Updated on: 

KL Rahul Test Century: न्यूझीलंडविरुद्ध वेलिंग्टन येथील बेसिन रिझर्व्ह मैदानावर सुरू असलेल्या पहिल्या कसोटी सामन्यात भारतीय फलंदाज केएल राहुलने शानदार शतक झळकावले आहे. संयमी फलंदाजी करत राहुलने तिसऱ्या दिवशी आपले शतक पूर्ण केले. या शतकासह त्याने भारतीय क्रिकेटमध्ये एक नवा विक्रम आपल्या नावावर केला आहे.

न्यूझीलंडने पहिल्या डावात ३६८ धावा केल्या होत्या. या धावसंख्येचा पाठलाग करताना भारतीय संघाकडून केएल राहुलने महत्त्वाची खेळी केली. दुसऱ्या दिवसाचा खेळ संपला तेव्हा राहुल ५२ धावांवर नाबाद होता. तिसऱ्या दिवशीही त्याने आपली लय कायम ठेवली. तब्बल २०७ चेंडूंचा सामना करत त्याने शतक पूर्ण केले.

हे राहुलच्या कसोटी कारकिर्दीतील १३ वे शतक आहे. विशेष म्हणजे न्यूझीलंडच्या भूमीवर आणि न्यूझीलंडविरुद्धचे त्याचे हे पहिलेच कसोटी शतक आहे.

चारही SENA देशांमध्ये शतक झळकावणारा पहिला भारतीय सलामीवीर

केएल राहुलच्या या शतकाचे विशेष महत्त्व आहे. त्याने दक्षिण आफ्रिका, इंग्लंड, न्यूझीलंड आणि ऑस्ट्रेलिया या चारही देशांमध्ये कसोटी शतक झळकावण्याची कामगिरी केली आहे. या चार देशांना एकत्रितपणे SENA देश म्हटले जाते.

विशेष म्हणजे, चारही SENA देशांमध्ये कसोटी शतक झळकावणारा राहुल हा पहिला भारतीय सलामीवीर ठरला आहे. या कामगिरीसह त्याने आशियातील निवडक दिग्गज फलंदाजांच्या यादीतही स्थान मिळवले आहे.

KL Rahul Test Century
Mohammed Siraj : प्लेईंग ११ वरून दोन राष्ट्रीय पक्ष भिडले... काँग्रेस खासदाराचे 'सिराज' नावाकडे बोट, भाजपकडून जडेजाचा उल्लेख

चारही SENA देशांमध्ये कसोटी शतक करणारे आशियाई फलंदाज

  • मोहम्मद अझरुद्दीन

  • सचिन तेंडुलकर

  • सईद अन्वर

  • राहुल द्रविड

  • युनूस खान

  • कुमार संगकारा

  • विराट कोहली

  • केएल राहुल

या यादीत स्थान मिळवणे ही राहुलच्या कसोटी कारकिर्दीतील महत्त्वाची कामगिरी मानली जात आहे.

SENA देशांमध्ये राहुलचे सातवे शतक

दक्षिण आफ्रिका, इंग्लंड, न्यूझीलंड आणि ऑस्ट्रेलिया या देशांमध्ये सलामीवीर म्हणून खेळताना केएल राहुलने आतापर्यंत सात कसोटी शतके झळकावली आहेत.

या कामगिरीसह तो भारताचे माजी सलामीवीर सुनील गावस्कर यांच्या विक्रमाच्या जवळ पोहोचला आहे. गावस्कर यांनी SENA देशांमध्ये सलामीवीर म्हणून आठ कसोटी शतके झळकावली आहेत. त्यामुळे राहुलला या विक्रमाची बरोबरी करण्यासाठी आता केवळ एका शतकाची गरज आहे.

KL Rahul Test Century
Who is Kumar Kushagra : अभिषेक शर्मा-वैभव सूर्यवंशी फ्लॉप, 'छोट्या धोनी'चा धमाका! संकटातून भारताला सावरत ठोकले शतक

SENA देशांमध्ये सर्वाधिक कसोटी शतके झळकावणारे भारतीय सलामीवीर

खेळाडू - शतके

सुनील गावस्कर - ८

केएल राहुल - ७

यशस्वी जैस्वाल - ३

विनू मांकड - ३

वीरेंद्र सेहवाग - ३

रवी शास्त्री - ३

केएल राहुलच्या या शतकामुळे भारतीय संघाला आधार मिळाला आहे. तसेच परदेशातील कठीण खेळपट्ट्यांवर धावा करण्याची आपली क्षमता त्याने पुन्हा एकदा सिद्ध केली आहे. आता सुनील गावस्कर यांच्या विक्रमाशी बरोबरी करण्यासाठी राहुलला आणखी एका शतकाची प्रतीक्षा आहे.

लोकल ते ग्लोबल बातम्यांसाठी डाऊनलोड करा दैनिक पुढारीचे Android आणि iOS मोबाईल App.

'Pudhari' is excited to announce the relaunch of its Android and iOS apps. Stay updated with the latest news at your fingertips.

Android and iOS Download now and stay updated, anytime, anywhere.