Sanjay Gupta Passes Away: बॉलिवूडमधून एक दुःखद बातमी समोर आली आहे. प्रसिद्ध चित्रपट दिग्दर्शक संजय गुप्ता यांचे निधन झाले आहे. 30 ऑक्टोबर 2026 रोजी त्यांनी अखेरचा श्वास घेतल्याची माहिती ‘फिल्म इन्फॉर्मेशन’ या मनोरंजन क्षेत्रातील प्रकाशनाने दिली आहे. मिळालेल्या माहितीनुसार, संजय गुप्ता बाथरूममध्ये पडले होते. त्यानंतर त्यांचे निधन झाले. मात्र, या घटनेबाबत अधिक तपशील अद्याप समोर आलेले नाहीत.
संजय गुप्ता यांनी हिंदी चित्रपटसृष्टीत स्वतःची वेगळी ओळख निर्माण केली होती. विशेषतः अॅक्शन आणि गुन्हेगारी पार्श्वभूमीवरील चित्रपटांसाठी ते ओळखले जात होते. त्यांच्या चित्रपटांमधील अॅक्शन दृश्ये, जबरदस्त कथा आणि मुंबईतील गुन्हेगारी जगाचे चित्रण प्रेक्षकांच्या पसंतीस उतरले होते.
संजय गुप्ता आणि अभिनेता संजय दत्त यांची जोडी हिंदी चित्रपटसृष्टीत विशेष गाजली. या दोघांनी ‘कांटे’ (2002), ‘मुसाफिर’ (2004), ‘जिंदा’ (2006) आणि ‘शूटआऊट अॅट लोखंडवाला’ (2007) यांसारख्या चित्रपटांमध्ये एकत्र काम केले.
‘शूटआऊट अॅट लोखंडवाला’ हा चित्रपट त्यांच्या कारकिर्दीतील महत्त्वाचा चित्रपट ठरला. 1991 मध्ये मुंबईतील लोखंडवाला कॉम्प्लेक्समध्ये झालेल्या गोळीबाराच्या घटनेवर हा चित्रपट आधारित होता. या चित्रपटाचे दिग्दर्शन करण्यासोबतच संजय गुप्ता यांनी निर्मिती आणि लेखनाची जबाबदारीही सांभाळली होती.
यानंतर त्यांनी ‘शूटआऊट अॅट वडाळा’ (2013) हा चित्रपट दिग्दर्शित केला. हा चित्रपटही सत्य घटनांपासून प्रेरित होता. याशिवाय ऐश्वर्या राय बच्चनची मुख्य भूमिका असलेला ‘जज्बा’ (2015) आणि हृतिक रोशन व यामी गौतम यांचा ‘काबिल’ (2017) या चित्रपटांचेही त्यांनी दिग्दर्शन केले.
संजय गुप्ता यांच्या नावावर अनेक वेगवेगळ्या धाटणीचे चित्रपट आहेत. ‘दस कहानियां’ (2007), ‘अॅसिड फॅक्टरी’ (2009) आणि जॉन अब्राहम व इमरान हाश्मी यांची भूमिका असलेला ‘मुंबई सागा’ (2021) हे त्यांचे काही महत्त्वाचे चित्रपट आहेत.
दिग्दर्शनासोबतच त्यांनी निर्मिती क्षेत्रातही काम केले. 2001 मध्ये त्यांनी ‘व्हाइट फेदर फिल्म्स’ या निर्मिती संस्थेची स्थापना केली. या बॅनरअंतर्गत त्यांनी अनेक चित्रपटांची निर्मिती केली.
त्यांच्या अलीकडच्या चित्रपटांमध्ये ‘द मिरांडा ब्रदर्स’ आणि ‘विस्फोट’ (2024) यांचा समावेश आहे. ‘द मिरांडा ब्रदर्स’मध्ये मीझान जाफरी आणि हर्षवर्धन राणे दिसले होते. तर ‘विस्फोट’मध्ये रितेश देशमुख आणि फरदीन खान यांनी महत्त्वाच्या भूमिका साकारल्या होत्या.
चित्रपट दिग्दर्शक होण्यापूर्वी संजय गुप्ता यांनी पोस्ट प्रॉडक्शन आणि साउंड डिझाइन क्षेत्रात काम केले होते. त्यांनी दिग्दर्शक पंकज पराशर यांना सहाय्यक म्हणूनही काम केले. ‘करमचंद’ ही दूरचित्रवाणी मालिका आणि ‘जलवा’ या चित्रपटासाठी त्यांनी काम केले होते.
आपल्या वेगळ्या दिग्दर्शनशैलीमुळे संजय गुप्ता यांनी हिंदी चित्रपटसृष्टीत स्वतंत्र स्थान निर्माण केले. अॅक्शन, गुन्हेगारी कथा आणि मुंबईच्या पार्श्वभूमीवर आधारित चित्रपट ही त्यांची खास ओळख होती. त्यांच्या निधनामुळे हिंदी चित्रपटसृष्टीतील एका वेगळ्या शैलीच्या दिग्दर्शकाला मुकावे लागले आहे.