Salman Khan Angry On Paparazzi: बॉलिवूड अभिनेता सलमान खान पुन्हा एकदा चर्चेत आला आहे. यावेळी कारण आहे त्याचा संताप. मंगळवारी रात्री सलमान खान मुंबईतील हिंदुजा रुग्णालयाबाहेर दिसला. मात्र, यावेळी चाहत्यांपेक्षा पापाराझींवरच त्याचा राग अनावर झाल्याचं पाहायला मिळालं. एवढंच नाही तर मध्यरात्रीनंतर जवळपास 3 वाजता सलमानने सोशल मीडियावर सलग चार पोस्ट करत आपली नाराजी उघडपणे व्यक्त केली.
मिळालेल्या माहितीनुसार, सलमान खान हिंदुजा रुग्णालयात कोणाला भेटण्यासाठी गेला होता. याबाबत कोणतीही अधिकृत माहिती समोर आलेली नाही.
दरम्यान, रुग्णालयाबाहेर उपस्थित असलेल्या पापाराझींनी सलमानला पाहताच फोटो आणि व्हिडिओ घेण्यासाठी गर्दी केली. “भाई-भाई”, “सलमान खान” अशा आरोळ्या देत त्याचं लक्ष वेधण्याचा प्रयत्न करण्यात आला. हे पाहून सलमान संतापल्याचं व्हिडिओमध्ये दिसून आलं.
सलमानने संतप्त होत, “तुमच्या कुटुंबातील एखादी व्यक्ती रुग्णालयात दाखल असेल तर तुम्ही अशी प्रतिक्रिया द्याल का?” असा सवाल केला आहे.
या घटनेनंतर सलमान खानने रात्री उशिरा इंस्टाग्रामवर सेल्फी पोस्ट करत सलग चार पोस्ट शेअर केल्या. त्यात त्याने पापाराझी कल्चरवर नाराजी व्यक्त केली.
पहिल्या पोस्टमध्ये त्याने माध्यमांनी संवेदनशीलता दाखवावी, अशी भूमिका मांडली. तर पुढील पोस्टमध्ये “चित्रपट महत्त्वाचा की एखाद्याचं आयुष्य?” असा सवाल करत अप्रत्यक्षपणे पापाराझींवर टीका केली.
एका पोस्टमध्ये त्याने “मी 60 वर्षांचा झालो, पण लढायला विसरलो नाही,” असं लिहित संताप व्यक्त केला. या पोस्टनंतर सोशल मीडियावर चर्चांना उधाण आलं आहे.
सलमान खानच्या या पोस्टनंतर सोशल मीडियावर वेगवेगळ्या प्रतिक्रिया उमटताना दिसत आहेत. काही जणांनी सलमानच्या भूमिकेला समर्थन दिलं असून, रुग्णालयासारख्या संवेदनशील ठिकाणी पापाराझींनी संयम ठेवावा, असं मत व्यक्त केलं आहे. तर काहींनी सलमानच्या भाषेवरही प्रश्न उपस्थित केले आहेत.
वर्कफ्रंटबद्दल बोलायचं झाल्यास, सलमान खान सध्या 'मातृभूमी' चित्रपटाच्या शूटिंगमध्ये व्यस्त आहे. यामध्ये त्याच्यासोबत चित्रांगदा सिंग दिसणार आहे. याशिवाय तो दिग्दर्शक वामशी पेडिपल्ली यांच्या आगामी चित्रपटातही काम करत असून, त्यात नयनतारा प्रमुख भूमिकेत असणार आहे.
