विटा; पुढारी वृत्तसेवा : एका चोरीच्या तपासात सांगली- सोलापूर जिल्ह्यातील तब्बल नऊ वेगवेगळ्या ठिकाणच्या चोऱ्या उघडकीस आणण्यात विटा पोलिसांना यश आले. याप्रकरणी सिताराम लक्ष्मण येडगे (वय २८, रा.पानीव, ता. माळशिर स, जि. सोलापूर) या संशयित आरोपीस अटक केले असून त्याच्याकडून १ ट्रॅक्टर, ६ रोटावेटर, १ ब्लोअर यासह १० लाख १२ हजार ५०० रूपयांचा मुद्देमाल जप्त केला आहे.
याबाबत पोलिस निरीक्षक संतोष डोके यांनी सांगितले की, ४ ऑगस्टच्या मध्यरात्री आपल्या घरासमोरून एक व्हीएसटी शक्ती कंपनीचा १८ एचपीचा ट्रॅक्टर चोरीला गेल्याची फिर्याद मारुती विठोबा माने (करंजे, ता. खानापूर) यांनी विटा पोलिसांत दिली होती.
या गुन्ह्याचा तपास पोलिस हवालदार रविंद्र धादवड करीत होते. हा तपास सुरू असताना शिरवळ पोलीस ठाण्याकडील ट्रॅक्टर चोरीमधील रेकॉर्डवरील आरोपीची तांत्रिक माहिती घेवून तपास केला असता माळशिरस तालुक्यातील पानीव येथील सिताराम लक्ष्मण येडगे यांचे नाव समोर आले.
यानंतर पोलीस अधिक्षक दिक्षीत गेडाम, अप्पर अधिक्षक मनिषा दुबुले, उपविभागीय अधिकारी पदमा कदम यांच्या मार्गदर्शनाखाली उपनिरीक्षक जालींदर जाधव, पांडुरंग कण्हेरे, रवींद्र धादवड यांच्यासह कसून तपास केला.
त्यावेळी संशयित आरोपी सिताराम येडगे याने फक्त करंजे येथील ट्रॅक्टरच नव्हे तर सांगली आणि सोलापूर जिल्ह्यातील विविध नऊ ठिकाणी चोऱ्या केल्याचे उघडकीस आले आहे. यात ३ लाख ३४ हजार किमतीचा १ ट्रॅक्टर, ४ लाख ५८ हजार रुपयांचे शक्तीमान कंपनीचे ६ रोटावेटर, ५५ हजार रूपयेचा १ औषध फवारणीचा ब्लोअर, ९९ हजाराचे टाईल्स फरशीचे ९९ बॉक्स, ५० हजार रुपयांचे १ टन वजनाचे लोखंडी अँगल आणि ४ हजार ५०० रुपयांची सिमेंट पत्र्याची ८ पाने, १२ हजार रुपयांचे रंगाचे ८ डबे अशा एकूण १० लाख १२ हजार ५०० रुपयांची शेती अवजारे आणि इतर साहित्याची चोरी करून बाजारात विक्री केल्याचे उघडकीस आले आहे.
संशयित आरोपी सिताराम येडगे याच्यावर खानापूर तालुक्यासह विटा शहर, आटपाडी, कवठेमंहाकाळ या पोलिस ठाण्यात प्रत्येकी एक गुन्हा दाखल आहे. शिवाय सांगोला पोलीस ठाण्यामध्ये तब्बल पाच गुन्हे त्याच्यावर दाखल आहेत. याप्रकरणी सिताराम येडगे यास विटा पोलिसांनी अटक केली असून अधिक तपास सुरू आहे.
हेही वाचलंत का?
