Who Is Prateek Yadav: समाजवादी पक्षाचे संस्थापक मुलायम सिंह यादव यांचा छोटा मुलगा प्रतीक यादव याचे वयाच्या ३८ व्या वर्षी लखनौमध्ये दुर्दैवी निधन झालं. प्रतीक हा मुलायम सिंह यादव यांच्या दुसऱ्या पत्नी साधना गुप्ता यांचा मुलगा होता. त्याचा मृत्यू कशामुळं झाला हे अजून कळालेलं नाही. शवविच्छेदनाचा अहवाल अजून आलेला नाही. त्यानंतर त्याच्या मृत्यूचे नेमके कारण समोर येईल.
प्रतीकला अनेक दिवसांपासून फुफ्फुसाचा आजार होता. त्याच्या फुफ्फुसामध्ये रक्ताची गुठळी झाली होती. त्याच्यावर उपचार सुरू होते.
प्रतीक जरी फिटनेस फ्रिक असला तरी त्याचे शैक्षणिक पार्श्वभूमी देखील दमदार होती. त्याने इंग्लंडमधील लीड्स विद्यापीठातून एमबीएची डिग्री घेतली होती.
प्रतीक हा फिटनेस वेडा होता. तो आपले जीममधील फोटो व्हिडिओ सोशल मीडियावर शेअर करत होता. त्याने २०१२ मध्ये आंतरराष्ट्रीय स्तरावरील बॉडी बिल्डिंग वेबसाईटवर इंटरनॅशनल ट्रान्सफॉर्मेशन ऑफ द मंथ म्हणून फिचर झाला होता. त्याने या ट्रान्सफॉर्मेशनचे श्रेय त्याने मुलायम सिंह यादव यांना दिलं होतं.
प्रतीक हा देशातील सर्वात शक्तीशाली राजकीय कुटुंबातील सदस्य असूनही तो राजकारणापासून अलिप्त राहिला होता. मात्र तो रिअल इस्टेट आणि फिटनेस व्यवसायात होता. लखनौमध्ये त्याची द फिटनेस प्लॅनेट नावाची जीम देखील होती. त्याचबरोबर तो होमलेस लोकांसाठीची एक एनजीओ देखील चालवत होता.
प्रतीकने अपर्णा बिश्त (अपर्णा यादव) सोबत २०११ मध्ये लग्न केलं होतं. या लग्नाला देशातील वजनदार राजकीय व्यक्ती, उद्योगपती आणि मनोरंजन क्षेत्रातील व्यक्तींची उपस्थिती होती. प्रतीक आणि अपर्णा यांना दोन मुलं देखील झाली.
अपर्णा ही भारतीय जनता पक्षाची सक्रीय कार्यकर्ती आहे. तिने आपली राजकीय कारकीर्द समाजवादी पक्षातून सुरू केली मात्र २०२२ मध्ये ती भाजपमध्ये गेली.
प्रतीक हा प्राण्यांच्या कल्याणासाठी सतत अग्रेसर होता. तो जीव आश्रय नावाची संस्था देखील चालवत होता. लखनौमधील ही एनजीओ प्राण्यांना उपचार, केअर, फूड आणि रेस्क्यू पुरवत होती.
