LPG Booking Rules Change : देशातील घरगुती एलपीजी (LPG) ग्राहकांसाठी केंद्र सरकारने एक महत्त्वाचा आणि दिलासादायक निर्णय घेतला आहे. ग्रामीण भागातील एलपीजी सिलिंडर रिफिल बुकिंगच्या कालावधीत मोठी सवलत देण्यात आली असून, आता शहरी आणि ग्रामीण अशा दोन्ही भागांतील ग्राहकांसाठी २५ दिवसांचा समान बुकिंग कालावधी लागू करण्यात आला असल्याची घोषणा केंद्रीय पेट्रोलियम, नैसर्गिक वायू आणि पर्यटन राज्यमंत्री सुरेश गोपी यांनी आज (दि. ७ सप्टेंबर) केली. सोमवारी यासंदर्भातील घोषणा केली. तेल विपणन कंपन्यांना या सुधारित नियमाची तातडीने अंमलबजावणी करण्याचे आदेश देण्यात आले आहेत.
फेब्रुवारी २०२६ मध्ये मध्य पूर्व आशियातील वाढत्या संघर्षाच्या पार्श्वभूमीवर निर्माण झालेल्या परिस्थितीमुळे सरकारने १२ मार्च २०२६ रोजी तात्पुरत्या स्वरूपात मागणी व्यवस्थापन (Demand Management) लागू केले होते. त्यानुसार शहरी भागातील ग्राहकांसाठी २५ दिवस, तर ग्रामीण भागातील ग्राहकांसाठी ४५ दिवसांच्या अंतरानेच पुढील सिलिंडर बुक करण्याचा नियम करण्यात आला होता.
मंत्रालयाने जारी केलेल्या अधिकृत पत्रात नमूद केल्यानुसार, सध्या देशातील एलपीजीचा पुरवठा सुरळीत झाला असून प्रलंबित बुकिंगची संख्या (Backlog) मोठ्या प्रमाणावर घटली आहे. त्यामुळे परिस्थितीचे पुनरावलोकन करून सरकारने ग्रामीण भागातील ४५ दिवसांचा बुकिंग कालावधी कमी करून तो २५ दिवसांवर आणला आहे.
पेट्रोलियम मंत्रालयाचे उपसचिव मोहित कुमार अग्रवाल यांनी इंडियन ऑइल (IOCL), भारत पेट्रोलियम (BPCL) आणि हिंदुस्थान पेट्रोलियम (HPCL) या तिन्ही प्रमुख तेल विपणन कंपन्यांना (OMCs) या निर्णयाची त्वरित अंमलबजावणी करण्याचे आदेश दिले आहेत. या निर्णयामुळे आता देशातील सर्व घरगुती एलपीजी ग्राहकांना एका सिलिंडरच्या बुकिंगनंतर २५ दिवसांनी दुसरा सिलिंडर बुक करता येणार आहे.
