Asaduddin Owaisi
भोपाळ: "खरा मर्द तोच असतो, जो आपल्या पत्नीची गुलामी करतो, मी स्वतः याचा साक्षीदार आहे आणि माझी दाढी घरातच पांढरी झाली आहे," असे वक्तव्य एमआयएमचे प्रमुख, खासदार असदुद्दीन ओवैसी यांनी केले. समान नागरी कायद्याच्या विरोधात भोपाळमध्ये आयोजित एका जाहीर सभेत ते बोलत होते.
यावेळी ओवैसी म्हणाले की, "इथे उपस्थित असलेल्या Gen-Z तरुणांनी हात वर करा." यानंतर त्यांनी उपस्थितांना आवाहन केले की, "तुम्हीच बदल घडवून आणाल, तुम्ही तुमच्या मशिदी आबादीत ठेवाल, आई-वडिलांची सेवा कराल आणि बहिणींना त्यांचा हक्क मिळवून द्याल."
ओवैसींनी उपस्थितांना थेट सवाल केला की, "तुम्ही तुमच्या पत्नींची गुलामी कराल का?" त्यांनी हाच प्रश्न वारंवार विचारत उपस्थितांकडून प्रतिसाद घेतला आणि स्पष्ट केले की, यात कसलीही लाज किंवा भीती बाळगण्याचे कारण नाही. "खरा मर्द तोच आहे, जो आपल्या पत्नीची गुलामी करतो," असे ते म्हणाले.
ओवैसींनी स्वतःचे उदाहरण देत म्हटले, "मी तुमच्यासमोर उभा आहे. माझी दाढी उन्हात पांढरी झालेली नाही, तर ती घरातच पांढरी झाली आहे. माझ्याही घरात पत्नी आहे, दुसऱ्याच्या नाही. माझ्या बहिणींवर कोणताही अन्याय होणार नाही," असे सांगत त्यांनी अप्रत्यक्षपणे पंतप्रधान नरेंद्र मोदी यांच्यावर निशाणा साधला.
विशेष म्हणजे, भोपाळमधील ही रॅली समान नागरी कायद्याच्या विरोधात आयोजित करण्यात आली होती. यादरम्यान त्यांनी १७ सप्टेंबर रोजी जंतरमंतरवर UCC विरोधात होणाऱ्या आंदोलनात मोठ्या संख्येने सहभागी व्हावे, असे नागरिकांना आवाहन केले.
