Mira Bhayandar news
मुंबई: पंतप्रधान नरेंद्र मोदींचे वर्ग मित्र असगर अली वोरा यांना त्यांची जमीन परत मिळाली आहे. मीरा रोडचे रहिवासी असलेले ८१ वर्षीय वोरा यांनी पंतप्रधान नरेंद्र मोदींची भेट घेऊन तक्रार केली होती की, भाजप आमदार नरेंद्र मेहता यांच्या मालकीच्या बांधकाम कंपनीने भाईंदरमधील त्यांच्या जमिनीवर अतिक्रमण केले आहे.
मंगळवारी मेहता यांनी जाहीर केले की ते वादग्रस्त जमिनीचा ताबा सोडत आहेत आणि त्या भूखंडासाठी घेतलेली बांधकामाची परवानगीही परत करत आहेत. मेहता यांनी हे देखील सांगितले की, त्यांनी असगर अली वोरा यांच्या विरोधात यापूर्वी दाखल केलेली तक्रार ते मागे घेत आहेत. वोरा यांनी गुजरातच्या वडनगरमधील बी.एन. स्कूलमध्ये मोदींसोबत शिक्षण घेतले होते.
वोरा यांनी ८ सप्टेंबर रोजी पंतप्रंतधानांची भेट घेतली आणि या वादात हस्तक्षेप करण्याची विनंती केली. त्यांनी सांगितले की, १९८९ मध्ये त्यांनी नवघर, भाईंदर (पूर्व) येथे सुमारे २,८१० चौरस मीटर जमीन खरेदी केली होती; परंतु २०११ मध्ये 'स्वयं बिल्डर्स' आणि मेहता यांच्या 'सेव्हन-इलेव्हन कन्स्ट्रक्शन्स'ने या भूखंडावर अतिक्रमण केले. ते गेल्या १५ वर्षांपासून विविध सरकारी अधिकाऱ्यांकडे या प्रकरणाचा पाठपुरावा करत होते. पंतप्रधानांशी झालेल्या भेटीदरम्यान त्यांना सकारात्मक प्रतिसाद मिळाल्याचे त्यांनी म्हटले होते.
भेटीनंतर सरकारी अधिकाऱ्यांनी या प्रकरणावर कारवाई सुरू केली. मंगळवारी, मुख्यमंत्री कार्यालयाचे प्रधान सचिव श्रीकर परदेशी यांनी मंत्रालयात एक बैठक बोलावली. या बैठकीला वोरा, मेहता, मीरा-भाईंदर महानगरपालिका आयुक्त राधा बिनोद शर्मा आणि नगररचनाकार पुरुषोत्तम शिंदे उपस्थित होते.
बैठकीदरम्यान, मेहता यांनी नगररचना विभागाला एक पत्र सादर केले, ज्यामध्ये त्यांनी वादग्रस्त जमिनीचा ताबा सोडत असल्याचे आणि बांधकामाची परवानगी परत करत असल्याचे नमूद केले. या पत्रात मेहता यांनी नमूद केले की, ही जमीन २०१९ मध्ये मर्विन फर्नांडिस यांच्याकडून खरेदी करण्यात आली होती. पोलीस आयुक्तांना लिहिलेल्या एका स्वतंत्र पत्रात आमदार मेहता यांनी सांगितले की, दोन्ही पक्षांमध्ये समझोता झाल्यामुळे ते वोरा यांच्या विरोधातील आपली पूर्वीची तक्रार मागे घेत आहेत.
