नाशिक (पंचवटी) : पुढारी वृत्तसेवा
औरंगाबाद महामार्गावरील हॉटेल मिर्ची चौकात झालेल्या अपघातानंतर 'हॉट ब्लॅक स्पॉट' बाबत महापालिका प्रशासनाने अतिक्रमण काढण्यासंबंधी दिलेली १५ दिवसांशी मुदत संपुष्टात आल्याने मनपाच्या नगर रचना विभाग व अतिक्रमण विभागाने पोलीस फौज फाट्यासह मिरची हॉटेल व नाशिक वडापाव यांच्या अतिक्रमण जमीनदोस्त केले.
या भागातील पक्के अतिक्रमण काढण्याचे काम युद्ध पातळीवर सुरू असून अपघातानंतर या भागातील अतिक्रमण धारकांना १५ दिवसांची अतिक्रमण काढण्यासंदर्भात नोटीसा देण्यात येऊन जागेवर रेखांकन करण्यात आले होते. यानंतरही सदर अतिक्रमण धारकांकडून कुठलीही अतिक्रमण काढण्यासंबंधी हालचाल झालेली नव्हती. आज मात्र अतिक्रमण काढण्याची मुदत संपल्याने महापालिकेच्या अतिक्रमण विभागाकडून सदर अतिक्रमणावर हातोडा चालवण्यात आला व संपूर्ण अतिक्रमण जमीनदोस्त करण्यात आले.
