नागपूर, पुढारी वृत्तसेवा : शिवसेना उद्धव ठाकरे गटाचे प्रवक्ते खासदार संजय राऊत यांनी शनिवार ( दि. ३ ) केलेल्या वक्तव्यावर खेद व्यक्त केला. यानंतर विरोधी पक्षनेते अजित पवार यांनी देखील माघार घेतली आहे. संजय राऊत हे मोठे नेते असून त्यांचे वक्तव्य मी मनाला लावून घेत नाही, इतरांनी तरी ते कशाला मनाला लावून घ्यावे, अशी प्रतिक्रिया आज (दि.४) अजित पवार यांनी प्रसारमाध्यमांशी बोलताना नागपुरात व्यक्त केली. ( Ajit Pawar On sanjay Raut )
ओबीसी शिबिराच्या,पदाधिकाऱ्यांच्या भेटीगाठी निमित्त नागपूर दौर्यावर असलेले अजित पवार म्हणाले, "महाविकास आघाडीच्या नेत्यांमध्ये कुठलाही वाद नाही. आम्ही पक्ष म्हणून वेळोवेळी भूमिका मांडत असतो. संजय राऊत हे मोठे नेते आहेत. राज्यसभेचे सदस्य आहत. त्यांचे वक्तव्य मीच मनाला लावून घेत नाही, तुम्ही तरी कशाला लावून घेता? अनेकांनी संताप व्यक्त केला. नाराज कार्यकर्त्यांना मी समजावून सांगेल. त्यांची काळजी तुम्ही करू नका."
वारंवार हा प्रकार होत असल्याने संजय राऊत यांनी संयम ठेवावा, असे तुम्ही उद्धव ठाकरेंना सांगणार का?, असा प्रश्न विचारण्यात आला असता अजित पवार म्हणाले, संजय राऊत हे एका पक्षाचे प्रवक्ते आहेत. एखाद्या पक्षाच्या प्रवक्त्याने काय बोलावे, काय भूमिका मांडावी, हा त्यांचा अंतर्गत प्रश्न आहे. त्याबद्दल मी काय बोलणार? असे म्हणत त्यांनी काहीशी माघार स्वीकारली.
हेही वाचा :
