पुणे: महाराष्ट्र दहशतवादविरोधी पथकाने (एटीएस) पाकिस्तानी गँगस्टर शहजाद भट्टीशी संबंधित असल्याचा संशय असलेल्या जाळ्यावर मोठी कारवाई करत पुणे आणि पिंपरी-चिंचवड परिसरात विविध ठिकाणी छापे टाकले. या कारवाईदरम्यान काही संशयितांना ताब्यात घेऊन त्यांची चौकशी सुरू असल्याची माहिती एटीएसने दिली.
एटीएसच्या प्राथमिक तपासानुसार, शहजाद भट्टी आणि त्याच्या साथीदारांनी फेसबुक, इन्स्टाग्राम, टेलिग्राम आणि व्हॉट्सअॅप यांसारख्या सोशल मीडिया प्लॅटफॉर्मचा वापर करून तरुणांशी संपर्क साधण्याचा तसेच त्यांच्यावर प्रभाव टाकण्याचा प्रयत्न केल्याचा संशय आहे.
या प्रकरणाचा सखोल तपास सुरू असून, सोशल मीडियाच्या माध्यमातून तयार करण्यात आलेल्या संपर्क जाळ्याचा आणि त्यामागील उद्देशाचा शोध एटीएसकडून घेतला जात आहे. तपासाच्या अनुषंगाने आणखी काही महत्त्वाची माहिती समोर येण्याची शक्यता अधिकाऱ्यांनी व्यक्त केली आहे. दरम्यान चार दिवसापूर्वी देखील महाराष्ट्रात विविध ठिकाणी एटीएसने ही कारवाई केली होती.
