पुणे: पुरंदर तालुक्यात प्रस्तावित छत्रपती संभाजीराजे आंतरराष्ट्रीय विमानतळासाठी भूसंपादनास संमती देणाऱ्या शेतकऱ्यांना संमतिपत्रे देण्यासाठीची मुदत आता दि. ३० सप्टेंबर २०२६ पर्यंत वाढविण्यात आली आहे. शेतकऱ्यांच्या मागण्या तसेच भूसंपादन प्रक्रियेत येणाऱ्या विविध तांत्रिक अडचणी लक्षात घेऊन जिल्हाधिकारी जितेंद्र डुडी यांनी ही मुदतवाढ दिली आहे.
पुरंदर तालुक्यातील सात गावांमधून विमानतळासाठी जमीन संपादित केली जाणार आहे. विमानतळासाठी सुमारे १,२१८.७५ हेक्टर जमीन आवश्यक असल्याचे प्रशासनाकडून सांगण्यात आले आहे. एमआयडीसी कायद्याच्या कलम ३२(१) नुसार भूसंपादनाची प्रक्रिया राबविण्यात येणार आहे.
भूसंपादनास संमती देणाऱ्या शेतकऱ्यांना मोबदल्यापोटी रोख रकमेऐवजी विकसित भूखंड देण्याचा पर्याय उपलब्ध करून देण्यात आला आहे. त्यानुसार अंदाजे १० गुंठे विकसित भूखंड देण्याचा निर्णय घेण्यात आला आहे. तसेच संमती देणाऱ्या शेतकऱ्यांना प्रतिएकर सुमारे १ कोटी ६१ लाख १ हजार १२५ रुपये मोबदला देण्याची घोषणा जिल्हा प्रशासनाने केली आहे.
दरम्यान, संमतिपत्रे सादर करण्यासाठी सुरुवातीला दि. ७ ऑगस्टपर्यंत मुदत देण्यात आली होती. त्यानंतर ती दि. ३१ ऑगस्टपर्यंत वाढविण्यात आली. मात्र, शेतकऱ्यांकडून अधिक वेळ देण्याची मागणी होत असल्याने आता पुन्हा एकदा मुदतवाढ देण्यात आली आहे. त्यामुळे संबंधित शेतकऱ्यांना दि. ३० सप्टेंबरपर्यंत संमतिपत्रे सादर करता येणार आहेत.
विमानतळ प्रकल्पासाठी आवश्यक जमीन संपादनाची प्रक्रिया गतीने पूर्ण करण्यासाठी प्रशासनाकडून प्रयत्न सुरू आहेत. शेतकऱ्यांच्या अडचणी आणि मागण्यांचा विचार करून त्यांना प्रक्रिया पूर्ण करण्यासाठी पुरेसा वेळ मिळावा, या उद्देशाने ही मुदतवाढ देण्यात आल्याचे प्रशासनाकडून स्पष्ट करण्यात आले.
