पुणे : जिल्ह्यात यंदाच्या 2025-26 च्या ऊस गाळप हंगामात 13 साखर कारखान्यांचा ऊस गाळप हंगाम सुरू आहे. या कारखान्यांनी शुक्रवारअखेर (दि. 5) सुमारे 14 लाख 83 हजार 553 मेट्रिक टनाइतके ऊस गाळप पूर्ण केलेले आहे.
हंगामाच्या सुरुवातीपासूनच खासगी साखर कारखान्यांनी ऊस गाळपात आघाडी घेतली आहे. त्यामध्ये बारामती ॲग्रो अग्रस्थानी असून, त्याखालोखाल दौंड शुगर व श्रीनाथ म्हस्कोबा कारखान्यांचा अग्रक्रम येतो.
सहकारी साखर कारखान्यांकडूनही गाळप सुरू असल्याची माहिती पुणे प्रादेशिक साखर सह संचालक कार्यालयातून सांगण्यात आले. जिल्ह्यात सद्यःस्थितीत 8 सहकारी साखर कारखान्यांकडून 6 लाख 92 हजार 24 मेट्रिक टनाइतके ऊस गाळप पूर्ण झाले आहे. तर 5 खासगी कारखान्यांनी त्यापेक्षा अधिक म्हणजे 7 लाख 91 हजार 529 मेट्रिक टनाइतके ऊस गाळप पूर्ण केले आहे. म्हणजेच 13 साखर कारखान्यांचे ऊस गाळपातून 14.83 लाख मेट्रिक टन ऊस गाळप पूर्ण झाल्याची माहिती पुणे प्रादेशिक साखर सह संचालक कार्यालयातील कृषी अधिकारी शेषराव डोळे यांनी दिली.
कारखान्याचे नाव - ऊस गाळप (मेट्रिक टन)
भीमाशंकर सहकारी (आंबेगाव) - 90,701
दि माळेगाव सहकारी (बारामती) - 1,16,850
श्री विघ्नहर सहकारी (जुन्नर) - 74,286
भीमा पाटस-श्री साईप्रिया शुगर्स लि. (दौंड) - 81,001
श्री सोमेश्वर सहकारी (बारामती) - 1,14,524
श्री संत तुकाराम सहकारी (मुळशी) - 33,825
श्री छत्रपती सहकारी (इंदापूर) - 96,687
निरा भीमा सहकारी (इंदापूर) - 84,150
बारामती ॲग्रो लि. (इंदापूर) - 3,10,449
दौंड शुगर प्रा.लि. (दौंड) - 2,51,192
व्यंकटेशकृपा शुगर मिल्स लि. (शिरूर) - 57,795
श्रीनाथ म्हस्कोबा साखर कारखाना लि. (दौंड) -1,19,341
पराग ॲग्रो फुडस (शिरूर) - 52,752
