पुणे: पर्वती परिसरातील ‘नंदादीप एज्युकेशन सोसायटी’च्या शाळेच्या प्रवेशद्वारासमोर अनधिकृत पत्र्याचे शेड उभारण्यात आले आहे. त्यामुळे विद्यार्थ्यांच्या सुरक्षेचा प्रश्न ऐरणीवर आला आहे. येथे मंदिर देखील असून, यामुळे शाळेत येणारा मार्ग अरुंद झाला आहे. यासंदर्भात संस्थेच्या वतीने महापालिकेच्या शहर अभियंत्यांकडे तत्काळ कारवाईची मागणी करण्यात आली आहे.
संस्थेच्या निवेदनानुसार, पर्वती येथील शाळेच्या प्रवेशद्वारासमोर पत्र्याचे शेड उभारण्यात आले आहे. या प्रवेशद्वारातून विद्यार्थ्यांची ये-जा होत असून, रिक्षा, स्कूल व्हॅन आणि पालकांच्या वाहनांची मोठ्या प्रमाणावर वर्दळ असते.
अशा ठिकाणी अचानक उभारलेल्या शेडमुळे वाहतूक कोंडी व गोंधळ निर्माण होण्याची शक्यता आहे. दरम्यान, काही महिन्यांपूर्वी याच ठिकाणी गणपती मंदिराचे बांधकाम करण्यात आले होते. त्या वेळीही बांधकामाबाबत माहिती अधिकारांतर्गत अर्ज करून माहिती मागविण्यात आली होती.
मात्र, त्यावर अद्याप कोणतीही ठोस कार्यवाही झालेली नसल्याचा आरोप संस्थेच्या वतीने करण्यात आला आहे. नुकतीच उभारण्यात आलेली पत्र्याची शेड आणि मंदिराचे पक्के बांधकाम हे दोन्ही रस्त्याच्या जागेत येत असल्याचा दावा करण्यात आला आहे.
त्यामुळे आपत्कालीन परिस्थितीत अग्निशामक दल किंवा रुग्णवाहिका शाळेच्या आवारात पोहोचू शकणार नाही, अशी गंभीर परिस्थिती निर्माण झाली आहे. याचे गांभीर्य लक्षात घेऊन संबंधित अनधिकृत बांधकामांवर तत्काळ कारवाई करावी, अशी मागणी संस्थेचे अध्यक्ष यांनी निवेदनाद्वारे केली आहे.
