पुणे: महापालिकेने शहरातील अनधिकृत बांधकामांविरोधातील कारवाईला पुन्हा तीव्र केली आहे. मंगळवारी लोहगाव आणि खराडी परिसरात मोठी धडक कारवाई करण्यात आली. महापालिकेच्या अतिक्रमण व अनधिकृत बांधकाम निर्मूलन विभागाने सुमारे २१ हजार ४०० चौरस फुटांचे आरसीसी बांधकाम पाडून जमीनदोस्त केले. नव्याने महापालिकेच्या हद्दीत समाविष्ट झालेल्या गावांमध्ये वाढलेल्या बेकायदा प्लॉटिंग आणि अनधिकृत बांधकामांवर प्रशासनाने कठोर भूमिका घेत ही कारवाई केली.
महापालिका आयुक्त नवल किशोर राम यांच्या निर्देशानुसार अतिक्रमण व अनधिकृत बांधकाम निर्मूलन विभागाचे उपआयुक्त सोमनाथ बनकर यांच्या नियंत्रणाखाली सकाळी नऊ वाजल्यापासून कारवाईला सुरुवात करण्यात आली. लोहगाव येथील निंबाळकरनगर, सर्व्हे क्रमांक २९४ तसेच खराडी परिसरातील अनधिकृत बांधकामांवर कारवाई करण्यात आली. या मोहिमेत बांधकाम विकास विभागाचे अधिकारी आणि अभियंतेही सहभागी होते.
महापालिकेच्या हद्दीत नव्याने समाविष्ट झालेल्या गावांमध्ये गेल्या काही दिवसांत बेकायदा बांधकामांचे प्रमाण वाढले आहे. या भागांमध्ये बांधकामासाठी नियमानुसार महापालिकेची परवानगी आवश्यक असतानाही अनेक ठिकाणी परवानगीशिवाय बांधकामे सुरू असल्याचे निदर्शनास आले आहे. विशेषतः रात्रीच्या वेळी मजले उभारण्याचे प्रकार वाढल्याने अशा बांधकामांवर कठोर कारवाई करण्याच्या सूचना आयुक्त राम यांनी प्रशासनाला दिल्या आहेत.
गेल्या काही दिवसांपासून शहरातील अनधिकृत बांधकामांवरील कारवाई मंदावल्याची चर्चा होती. मात्र, आता ही मोहीम पुन्हा वेगाने सुरू करण्यात आली असून, नियमबाह्य बांधकामांविरोधातील कारवाई सातत्याने सुरू राहणार असल्याचे उपआयुक्त सोमनाथ बनकर यांनी स्पष्ट केले. या कारवाईसाठी महापालिकेचे दोन पोलीस अधिकारी, १३ पोलीस कर्मचारी, ३५ एमएसएफ जवान, पाच जेसीबी, सहा गॅसकटर, सात ब्रेकर आणि २५ बिगारी सेवकांचा ताफा तैनात करण्यात आला होता.
बेकायदा प्लॉटिंगपासून सावध राहण्याचे आवाहन
महापालिकेच्या हद्दीत नव्याने समाविष्ट झालेल्या गावांमध्ये मोठ्या प्रमाणावर बेकायदेशीर प्लॉटिंग करून भूखंडांची विक्री केली जात असल्याचे प्रशासनाच्या निदर्शनास आले आहे. त्यामुळे नागरिकांची आर्थिक फसवणूक होण्याची शक्यता असल्याने कोणत्याही बेकायदेशीर भूखंडाची खरेदी करू नये, असे आवाहन महापालिका आयुक्त नवल किशोर राम यांनी केले आहे.
